旺角朗豪坊效應，除咗帶挈遠東發展，好價售出對面旺角遠東銀行大廈舖位，邵氏兄弟有關人士亦都可能受惠，皆因佢哋持有十幾二十年嘅文華戲院舊址喺正隔籬，聞說有投資者出價三億洽購。
以該舖地下至二樓逾萬七呎計，每呎洽購價一萬七千幾，算係吸引。
個舖現由皇馬23酒吧等娛樂消閒場所租用，月租四十二萬五，至○七年六月，回報只得一厘七，所以同遠展接貨嘅黎永滔，聽見都話「咁貴？」重話佢冇出價洽購，而遠展件貨就諗住長線收租。
邵氏重揸住一街之隔嘅南華戲院地下連一樓舖，有近萬二呎，月收逾三十萬，大租客荷李活夜總會，租期至二○一二年十月，市傳叫價逾一億。
邵氏五月曾售出深水埗黃金戲院舊址，收咗一億四千三。
長實向來最鍾意同其他發展商行家齊齊賣樓，借機會做免費宣傳，今次恒基西灣河嘉亨灣開賣，佢哋就安排置業精英，喺西灣河地鐵站至嘉亨灣售樓處一帶，派東涌映灣園嘅傳單，貫徹佢哋湊熱鬧嘅作風。
除咗派傳單，周末開始，重會安排專車，接送睇樓客，由嘉亨灣售樓處，去紅磡映灣園售樓處，重話此舉係方便港島東買家。
不過，蘭西好懷疑，兩個樓盤一個喺東涌，一個喺西灣河，地點差咁遠，啲客咁都會一樣？!
沙田富豪花園業主，為咗購買同屋苑圖則王單位，不惜同賣方周旋兩個幾月，始能買得心頭好。
中記侯惠良話，單位為L座中層C，近千五呎，係屋苑少有放盤，買家喺五月聽聞有放售，即時搵賣方議價，但因對方經常唔喺香港，搞到傾談中斷，雙方間斷地搞咗兩個幾月，近日終於落實以逾三百八萬成交，每呎近二千六。
侯惠良話，呢個成交價只係屬於合理價，但因為賣方九八年買入價都係三百八萬，所以願平手離場。至於買家本身已有個逾千二呎單位自住。
飲食業連鎖店趁市旺積極擴充，其中扒王之王剛剛一擲逾四千萬，買入銅鑼灣謝斐道四八三至四九九號地下連一樓舖，九千五呎，準備開旗艦店，該舖為阿東拉麵舊址，交吉出售，每呎近四千三。
蘭西喺飲食網站查悉，扒王之王已有十五間分店，銅鑼灣、灣仔、尖沙嘴等旺點早有駐足，遠至元朗亦有。
地產代理話，扒王之王老細，以往好少買舖，但未來睇好舖市，重計劃喺核心消費區，如中環、旺角等繼續買舖，看來勢成舖市生力軍。
蘭西
電郵地址：
