趙薇自從捲入涉嫌毆打孕婦鄒雪事件之後，一直都冇公開露面，連北京調查呢件事嘅派出所都搵佢唔到，𠵱家連鄒雪都封嘴。件事演變到好複雜，一時又話鄒雪私自賣咗佢同趙薇合夥嘅酒吧，一時又話鄒雪欠趙薇五萬蚊美金，馮仁昭聽鄒雪個律師鄭軍講，話被指帶頭去打鄒雪嘅趙薇司機吳玨已經主動去咗派出所協助調查，司機聲稱自己冇郁手打人。
鄭軍又話佢𠵱家正努力搜集證據，其間出現過一啲有勢力人士嘅阻撓，不過佢已掌握咗啲證據，有啲證據係高度保密嘅，佢重去咗趙薇住所，搜集七月二十八同二十九日期間，趙薇住所監控系統嘅資料，包括拍攝到喺佢住所出入紀錄嘅錄影帶，等佢哋搜集好所有認為對調查事件有幫助嘅證據後，鄒雪方面就會喺下個禮拜發聲明。
馮仁昭又聽鄒雪嘅朋友肖群講話醫生認為已經有八個月身孕嘅鄒雪隨時都可能要生，重話鄒雪應該冇同趙薇借五萬蚊美金，而酒吧因為有太多事情未解決，所以都冇理由賣得出咁話，其實馮仁昭都好想聽吓趙薇方面嘅說法。
官恩娜（Ella）噚日去到九展擔任「森美小儀K饉40」嘉賓，佢好開心話因為天雨，原本要拍戲最後取消咗，所以變相有半日假。Ella話已經有近三個月冇放過假，但係佢就唔希望公司減少佢嘅工作量，佢寧願盡量去做，不過佢好擔心自己把聲會變沙而影響演出。
張惠妹四年前喺台灣總統陳水扁就職禮上唱「國歌」遭內地封殺，佢解封後日前首次喺北京開演唱會，阿妹噚日喺台灣，被問到佢到底支持邊個，佢用國語話：「我只是個藝人，大家要多點愛和寬容，不要再把我放在其中。」提到四年前可是自願唱「國歌」，佢又話：「沒有願不願意的事，請大家不要用煽動的字眼，藝人不應該涉及政治。」
劉曉慶雖然之前講過以後都唔會返四川，但前日就同男友阿峯返去做咗一個晚會嘉賓，噚日有內地報章話劉曉慶接拍咗部百集古裝劇，飾演二十歲少女，佢重喺七月底特登去廣州整容，首先做光動力嫩膚，又打針除咗眼部、前額同唇部嘅皺紋。劉曉慶喺醫院調養咗一星期就返北京，佢個整容醫生曹武燕重特登去北京幫佢拆線，曹醫生重話劉曉慶之前冇整過容，不過毛孔好粗，𠵱家整完容，好似個二十歲少女喎。
日前有報道指錫安教覺得Beyond所做嘅和平手勢係代表魔鬼撒旦，黃貫中（Paul）噚日去商台接受訪問時話自己只係做音樂，希望對方唔好搞佢，佢亦都覺得呢件事唔需要提，阿Paul重好抵死咁一見到記者就話：「你今日飲咗未（雙氧水）呀？」另外，阿Paul好開心話自己出咗碟一個星期，雖然冇乜宣傳，但係外間反應都好好。
