吳彥祖、尹子維、陳子聰和連凱最近合作拍攝電器廣告，他們還合作唱廣告歌，吳彥祖表示與陳子聰等人合作拍攝該廣告十分辛苦，除了拍足二十小時外，更因為要爬高爬低，一度拉傷膊頭肌肉。
吳彥祖、尹子維、陳子聰和連凱最近擔任電器品牌JVCPlasmaTV的代言人。四人難得合作拍廣告，還首次合唱廣告歌。
這條廣告片由導演林超賢操刀，因為廣告片中講述吳彥祖及陳子聰等四人鬥快搶電視遙控器，結果由吳彥祖取得。吳彥祖表示拍攝這個廣告很辛苦，他說：「我要爬高爬低，都拉傷膊頭肌肉，記得上次拍林超賢部戲都好辛苦，呢次拍佢負責嘅廣告一樣，廣告都拍咗成二十個鐘。」
吳彥祖還透露他們一齊唱廣告歌，四人之中只有尹子維有錄音經驗，他更是首次進入錄音室，吳彥祖又說：「我喺錄音室都驚驚哋，我同尹子維講話叫佢咪扮『老屎忽』。」而事後陳子聰就大讚吳彥祖的歌藝有一百分。
問到吳彥祖和陳子聰等四人可考慮組織樂隊，然後揮低台灣男子組合F4，吳彥祖說：「你估後生仔咩，我哋咁老。」有報道指吳彥祖在和郭富城拍戲時教他做戲，對此吳彥祖講笑說：「人哋寫你又信，好明顯係作出嚟，鎮宇同秋生都係我教佢演技，佢哋要攞啲獎畀我，因為要多謝我係佢哋『演技師傅』。」
此外，穿上翼袖衫的陳子聰露出一雙粗壯手臂，問他的太太何超儀可有投訴，要求他減肥，陳子聰說：「佢不知幾鍾意，多啲嘢攬。」
