大記者好耐以前住過沙田第一城，頗喜歡沙田第一城嘅方便，而且覺得整個沙田、馬鞍山區之中，第一城嘅管理做得最好，維修一流。維修費當然來自住客，但管理處耐心策劃，分階段做工夫，逐座逐層更換外牆紙皮石，直情係舊樓維修嘅示範。
大記者呢日返第一城探朋友，順便買張報紙，點知經營近二十年嘅「啞仔報檔」已經人去舖空，門口貼出一張「美聯物業」不日開幕嘅招紙。呢檔由「說話障礙」嘅人士經營，係第一城嘅特色，以往生意極好，點解𠵱家要結束營業呢？唔通因為舖租太貴？佢嘅朋友話：「相信唔係，可能因競爭激烈，生意低落之故。嗱，離報檔不遠就有OK便利店，報紙每張只賣五蚊，有膠袋，送紙巾，啞仔檔仍售六元，點夠搶？但係如果佢賣五皮，又未必夠皮費喎，點都死！」
不少地方賣報紙，只售五元（馬經仍售六元），可見經濟雖然話轉好復甦，市民仍然㩒住荷包，用多一蚊買報紙都唔制。大記者嘅朋友每日坐巴士到九龍塘搭地鐵，佢話現在好少人買張報紙上地鐵車廂睇，個個都係攞份免費嘅《都市日報》，落車時就順手掉入垃圾桶。如此一來，地鐵車站內嘅報攤生意亦受影響。市民慳得就慳，睇完免費報，只肯用五蚊買暢銷報，邊張報紙夠膽加價嘅話，後果自負！勿講話加價，想加紙起紙，都好似推車上斜路咁辛苦啦。
重有一件事對報紙不利嘅，就係年輕人只買漫畫、電腦雜誌、八卦周刊，但唔買報紙，報紙係阿爸阿媽買嘅，年輕人冇興趣。如此趨勢，二十年後，香港報紙數目起碼減少一半。