商廈市道轉淡靜，但仍見有摸貨，甚至摸上摸，屋之島黃志強話，上環信德中心十四樓一室，逾二千五呎，今年兩度摸出，每次均賺逾二百萬。
單位二月成交呎價三千六百三，五月以四千六百五摸出，賺二百六十二萬。到七月再度摸出，升至五千八，執得重多，有二百九十四萬。單位升值六成，回報就跌到得番三厘三。
該廈另一個二十六樓五室，近二千五呎，七月以呎價四千九摸出，升值五十四萬。
另外，金鐘海富中心都錄得一宗摸貨，十七樓三室，逾九百四呎，以呎價近五千八摸出，賺三十三萬。
九龍塘畢架山一號，發展商長實強調，有唔少綠化環境，所以連花園單位都好搶手，唔少豪宅客鍾情。
長實郭子威就話，𠵱家成個盤得番五個地下連花園單位，即日推出第十九座一樓A，逾千九呎，另逾千四呎平台及花園。今個禮拜日截標，每呎底價一萬零五百，估計成交價逾二千萬。
今個月底前透過中原地產買呢類單位，送園林設計，重有喺入伙後嘅兩個月，每個禮拜送一百支玫瑰花畀業主做園林布置。
鷹君新旗艦物業朗豪坊陸續入伙，其中酒店噚日率先開幕，高層羅嘉瑞同李澄明一齊亮相，卻鬧出房間數目羅生門。
副主席兼董事總經理羅嘉瑞話，有六百六十五間客房，轉頭助理董事李澄明話有六百八十六。蘭西唔知信邊個好，即時拉住喺酒店招呼媒介嘅李生，佢解釋話，酒店房數目可以好彈性，有時一間房有兩個門口，門口數目同房數隨時有出入，一切以老闆羅嘉瑞所說為準。
李生更大力推銷呢間咁富彈性嘅香港旺角朗豪酒店，話推廣期有優惠，自助午餐又抵食云云。
今屆參選嘅港姐，早前曾到東莞嘉多利山花園參觀，發展商嘉連物業順勢搞促銷活動，推出「誰是今屆港姐冠軍」競猜遊戲，猜中有機會攞到十八萬置業獎金。
結果本月十八號，選完之後公布。
嘉多利山花園新推出嘅第二期豪郡，包括宏峰閣同曉峰閣，單位面積一千至三千零呎，𠵱家已賣咗近百伙。
近月樓市降溫，代理搵食難咗啲，喺新盤售樓處搶客情況增多，地產代理監管局話，該局七月二十七日起，一連九日派人巡查新樓盤，發現有六十五宗違規，要向涉嫌代理口頭警告，同發出指導函。
該區已經向六間代理行僱員嘅行為展開調查。
地監局指出，啲違規情況，主要係代理喺街度兜售，或者喺行人路邊，試圖截停經過嘅車輛。
地監局提醒，犯例代理有可能吊銷牌照，嚴重嘅，重可能會交由警方處理。
蘭西
電郵地址：
