油價急升創新高，加上國內又傳出宏調新措施──開徵能源稅及大幅調高現有資源稅，港股噚日一度失守12200關口，午後跌幅收窄，全日收報12280，跌76點，成交122億元，國企股早段遭拋售，午後跌幅才收窄。
港股收市後又傳出金管局入市買港元，結餘跌破100億元。走資情況持續，市場開始憂慮，唔使等美國再加息，本港可能先加息，就算唔加優惠利率都要加存款利率，事實上中銀香港（2388）先前已調高定存息率。港股利淡因素似乎揮之不去，公司業績幾好似乎都冇用。
好似地鐵（066）中期盈利勁升9倍幾，遠勝市場預期，但外資仍要搵藉口出貨，股價跌1.7%至11.60元。Cookie話，地鐵被質真係冇道理，如此投資氣氛，相信呢個月大市要向下尋底。
蓋茨基金的金手指效應威力不減，入股北人印刷（187）7.08%消息曝光，刺激投資者入市追捧，北人一度急升26%至2.775元，之後升幅收窄至17%，收報2.575元，較平均成交價2.617元低1.6%，意味噚日追貨平均要蝕錢。
阿虎發現一個現象，就是蓋茨基金與MartinCurrie中國對沖基金（MC）頗有緣。蓋茨基金入股的海域化工（2882），先前亦獲MC持逾5%，而MC亦持有北人逾5%。若兩基金的緣份延續下去，咁就要留意威高股份（8199）、山東墨龍（8261）、中怡精細（2341）、中國稀土（769）、天年生物（1178）、大賀（8243）、東江環保（8230）、一拖（038）、屹東電子（8249）與安德利（8259）。
阿虎