荷李活型男畢彼特（BradPitt）喺全球各地都迷倒唔少女fans，為咗吸引遊客，荷蘭阿姆斯特丹嘅杜莎夫人蠟像館，噚日首度公開一個畢彼特蠟像。為求增加動感，有關方面特登喺蠟像內裝置電動儀器，當你摸個蠟像嘅胸嗰陣，就好似摸到畢仔嘅心跳咁。而呢個「畢彼特」其實係館內首個打大赤膊嘅蠟像，難怪噚日蠟像館一開，已經有個着住比堅尼嘅女影迷撲埋去影相。