近日股份成交集中在大藍籌，令到鍾愛細價股的散戶如小初之流，簡直係悶到發慌。
大慶石化（362），前日停牌話供股。經紀陳話，佢都唔明點解大慶石化喺呢個時間搞供股。
大慶石化自從在今年1月賣殼畀亨泰消費品（197）後，不時有人出嚟力撐，話大慶石化好掂。但感覺上，隻股嘅氣勢唔及以前，兼且好似沽壓大咗，之前亦聽唔到大慶石化有資金壓力，突然間話供股，實在動機難明。
經紀陳話，江湖傳聞有間中資證券行，周圍搵行家幫手包銷大慶石化，據講係2供1，供股價較停牌前收市價0.38元，約有3成折讓。小初覺得除非有大隻佬肯攬上身，否則未必搞得成。
另外，建滔化工（148）早前表示南沙大型投資項目，因環保問題被叫停。不過，建滔股價並冇受呢單消息影響，一直企硬於14元樓上。經紀黃話，原因好簡單，皆因有人話即將在8月16日公布的中期業績，盈利會勁升，所以股價先至頂得住。
慕容小初