國際頂尖電結他高手SteveVai，闊別兩年再次嚟到香港開騷，佢唔止彈得一手好勁嘅電結他，重連條脷都用埋，佢亦透露BritneySpears最近成為佢鄰居，重唱咗首好具挑逗意識嘅名曲送畀呢位新鄰居！
今次SteveVai喺九展開騷，大會竟然喺呢個「罰企」場加上座位，搞到唔少買平飛嘅fans衝上前霸前排空位，場面一度混亂。有留意美國搖滾音樂嘅樂迷，都一定知道SteveVai手電結他有幾厲害，佢今次帶埋前Mr.Big低音結他手BillySheehan一齊喺台上鬥jam。Steve喺台上唔止玩十八弦結他，重用條脷彈出好尖銳嘅結他聲，令樂迷歎為觀止。
喺中場Steve同觀眾話：「我喺洛杉磯嘅屋企，隔籬本來係尊榮（JohnWayne）間好靚嘅故居，但最近俾人拆到支離破碎，原來我嘅新鄰居係BritneySpears！」Steve重隨即唱埋已故結他之神JimiHendrix首名曲《Fire》畀Britney，擺到明暗示佢夠晒惹火！
採訪、攝影：張一明
