早段雞飛狗走，恒指散過183點，埋單只係唔見76點。超人系股份領導大市反彈，和黃（013）與長實（001）分別有進帳75仙與50仙。前日推介嘅長實C輪9227同和黃C輪9390，前日微升，昨日彈跳13%與19%。
新地C輪9391：地產股中，新世界（017）、信置（083）與長實逆市向上。新地（016）則跌50仙，收65.25元。下一鋪，一係昨日有得升嘅地產股回落，一係新地追番上去。估計係新地追番上去居多，值得搵啲新地C輪短炒賺佢三茶兩飯。
新地C輪9977冇跟正股下跌而回落，收29仙，升4%，可能代表窩輪先行，然後輪到正股郁。隻輪10月尾到期，溢價9%，槓桿率22.5倍（有效槓桿率9.5倍），引伸波幅33%。博正股跟埋新世界、長實等彈番上去，買新地C輪，揀9391。9391昨日冇升，收52仙，12月中夠鐘，壽命着數過9977好多，溢價只係5.9%，槓桿率12.5倍（有效槓桿率7倍），引伸波幅32%，昨日成交由10球大增至56球，亦易買賣過9977。
中移動C輪：中移動（941）係昨日拖低恒指最多嘅大藍籌，收22.40元，跌35仙。博反彈，揀C輪炒，對象係9824。
9824喺9月尾夠鐘，輪價11.7仙，溢價5.2%，槓桿率19.1倍（有效槓桿率9.8倍），引伸波幅35%。隻輪時日有限，溢價唔算吸引，出擊嘅話，記得短線，甚至即日鮮，提防溢價收縮。過多若干日子，正股唔去嘅話，隻輪溢價縮剩兩三巴仙，輪價就會縮得好快，揸隻輪會幾傷吓。
章盛