滙控（005）同恒生（011）獨力難支，港股噚日都係要下跌。其實前日除滙恒之外，成個市嘅氣氛已令人不安，國企同二三線個勢特別曳，大市要回，滙恒暫時要委屈吓。
滙恒今次業績咁靚，大出大行同基金意料之外，特別係沽空嘅，同埋做咗唔少衍生產品嘅，都被打個措手不及，相信要等佢哋平番倉，重新部署好，滙恒先可以真真正正開車。中長線而言，滙控同恒生都揸得過，家吓大行睇滙控嘅目標價，由130元至145元不等，而恒生目標價則去到108元，兩股息率都有5厘，現水平入市，揸一年半載，好大機會財息兼收。
大市調整，又係低吸時機，中國海外（688）早輪見大行密密收集，上到1.55元水平都冇停手，家吓股價跟市調整，若落到1.35元水平，不妨上車，年底前好大機會賺到兩三成。
中海係內地最大的地產發展商之一，宏調未有帶來影響，今年上半年售樓，已完成全年目標的60%。集團每年銷售目標100萬方米，並計劃每年有20%增長，截至去年底止，手上有430萬方米土儲，再加上今年投得的3個新項目，分別位於香蜜湖、蘇州和成都，樓面逾160萬方米，足夠未來5年發展之用。
另外中海最近又有兩單消息，一個係同西安一航天科技產業開發區簽訂房地產合作意向，佔地68萬方米，總投資金額13億元；另一個係投得信置（083）旗下楊屋道建築合約，金額11.18億元。
不過，對中海股價更具刺激性的，係未來1年內，將會進行兩項分拆行動，其中的建築業務已成立新公司，計劃於主板以介紹形式上市，預期今年11月可成事，新公司的股份，將以紅股方式，派送予中海現有股東。建築業務現時佔集團營業額約50%，但盈利只有10%，分拆後，中海的業務將更見清晰。
另外，集團佔70%股權的中海地產股份公司，亦計劃分拆在A股上市，短期內會向中國證監會申請。
中海走勢形成大型圓底，近日突破後出現後抽，整固後再上，量度上升目標指向1.8元。
郭兆誠