韓星全智賢同張赫噚日喺台灣做宣傳，全智賢呢排喺台灣拍攝可口可樂廣告，又要宣傳電影，唔知係咪工作太密休息不足，全智賢噚日喺活動上就俾記者影到佢隻眼半開半合瞌眼瞓嘅相，睇嚟真係好攰噃。
全智賢出席活動時，成日俾人批評木無表情，噚日都唔例外，不過張赫就幫佢講好說話，佢透過繙譯話：「全智賢小姐也有很親切活潑的一面，她只是怕陌生人。」問張赫鍾意點樣嘅全智賢，佢話：「我們一起拍片的時候，氣氛都很融洽，她在不熟的人面前，不會表現出全部的自己。我相信真心喜歡她的人，應該不會在意她臉上有沒有笑容。」全智賢聽到張赫咁講，即刻露出一絲笑容。
全智賢講到對車太鉉和張赫兩位男對手嘅感覺時，就好幽默話：「張赫先生就坐在我旁邊，當然是張赫比較好囉！張赫是個很有深度的演員，也很會帶人入戲；車太鉉很有魅力，也很會引導觀眾的情緒。」
任達華噚日凌晨喺灣仔拍戲，卻有消息傳出佢同人打交，馮仁昭遂致電任達華了解整件事情況，佢話：「其實係拍戲時，我哋遇到有一名飲醉酒嘅外籍人士喺現場生事，當時有警方到場了解，但警方走咗，個外籍人士重唔肯走，佢重走埋我身邊指指點點，我於是用英文叫佢要禮貌啲，唔可以騷擾到人。」
由台灣導演侯孝賢執導嘅台日合資電影《珈琲時光》，早前入圍角逐將於下月舉行嘅威尼斯電影節。原來《珈》片亦得到韓國影評垂青，釜山國際電影展前日宣布，大會將在影展期間，頒發給侯孝賢「亞洲電影人獎」。
組合Twins日前喺北京出席《全球華語歌曲排行榜》發布會，噚日有台灣報章報道Twins喺活動上耍大牌、中途離場，又話Twins嘅助手同傳媒發生衝突，不過Twins嘅經理人霍紋希噚日就話完全冇呢啲事，Twins喺會上幾時嚟幾時走，都係遵從大會吩咐，霍紋希強調報道失誤，所以英皇已經決定向有關嘅台灣報章採取法律行動。
噚日有報道話應采兒同男友陸恭和喺街度嗌交，其間重郁手郁腳，對於呢件事，應采兒經理人李小姐話陸恭和同應采兒只係普通朋友，並唔係男女朋友，而有所動作嘅亦只係男方，應采兒冇做過任何嘢，重話呢本雜誌所報道嘅嘢唔需要理會。
