爆機狂迷:<br>薛高再度力撐《WinningEleven8》<br>球員球真名登場

爆機狂迷:
薛高再度力撐《WinningEleven8》
球員球真名登場

《WinningEleven》相信係有史以來最受歡迎嘅足球遊戲,耐玩性亦夠高,上集即使推出近一年,仍然係唔少機迷經常玩嘅遊戲之一,而且更有人不斷創出新招新戰術,襟玩度非其他遊戲可比。最新一輯嘅《WinningEleven8》將於明日正式發售,今次遊戲內所有球員均會以真實名稱登場,作為球迷兼機迷,更必定玩得更投入過癮。

記者:許福合

巴西球星薛高喺日本球壇地位,絕對係高人一等,曾任J.League球隊及日本國家隊領隊,在日本相當受歡迎,難怪再次搵嚟薛高擔任《WE8》封面人物兼代言人,各位見到薛高封面嘅《WE8》,千祈咪同《WE7》搞錯!

球員以實名登場
要提議改善《WE7》,筆者會第一時間提出球員名稱轉用真名,舊作將名稱改少少嘅做法,實在玩得唔夠盡興。《WE8》內所有球員均會以真實名稱登場,對球迷來講可謂一大喜訊,雖然遊戲內外國人名稱亦會以日文顯示,不過比賽時球衣背面會寫上球員嘅英文名稱,可以跟住改番晒,認人再無難度!不過比較可惜嘅係真名只適用於球員身上,《WE8》內只有部份球隊會以實名出現,當中包括荷蘭、西班牙及意大利聯賽,至於香港人最愛嘅英超聯就仍以假名代替。
除咗球員名夠「真」外,連樣貌像真度亦得到提升,基本上已可供各位認出各個球星,而遊戲設定內無論樣貌髮型都大幅增加,加上膚色等配搭,球員外貌可有非常多變化,亦更為逼真。

■一眼就可認出日本球星中田英壽,造型相當不俗。

■荷蘭聯賽係其中一個會出現真名球隊聯賽。



操控技巧多變化
今集重點放於遊戲內細微之處作改良,以往單打獨鬥式嘅「足球天才」有機會再現球場,因為盤球能更容易推進,足球會跟隨球員位置而轉動方向,雖然有時會覺得足球太離身,但只要把握機會可使出唔使過人招數,如推左走右、假身等,部份名牌球星會有其獨特盤球動作,除咗令球星更有風格外,玩家只要配合得好亦會意想不到效果。
《WE7》經常出現電腦傳球屈機情況,到埋門想送出必殺傳球,卻反而變成回傳替對手解圍。今集傳球將有所改動,會依據玩家按掣時間反映傳球力度,長傳時加埋方向鍵就更能控制傳球落點,練熟後長短傳都可做到隨心所慾,喜歡組織攻門玩家一定玩得更爽。另外罰球亦有新玩法,分為間接同直接自由球,玩家亦可按「Select」選擇找隊友配合,將罰球變成兩腳波,讓旁邊或後上隊友射門,以避過對方人牆,提高入球機會。

■費高又再使用高超盤球技術。

■玩慣球會賽事,亦可轉口味玩國家隊。

■只要睇準機會,仍可將對方足球搶回。

■日本球員都會以漢字顯示姓名,相當易辨認。

■喺Training模式,可先練好波先再落場。

■底線出波,可試試組織頭槌攻門。

■設定攻防戰略後,球員自會按指示走位。



機迷率先試玩
今次《WE8》推出可謂機迷大事,筆者就專登搵嚟3名對《WE》系列相當熟悉專家,率先試玩新作,睇吓佢哋對《WE8》嘅新改動有咩評價。

■Masterleague選項版面,《WE7》玩家必定易熟習。

■球員年紀大咗,就會宣布引退,又要花錢物色球員。

■賽程表設計得相當簡單又清楚,球員分配更易掌握。



遊戲類型:運動
對應機種:PS2
遊玩人數:1至8人
行貨售價:$428
推出日期:8月5日
開發商:KONAMI (c)2004KONAMI&KonamiComputerEntertainmentTokyo
代理:香港龍勇有限公司(22468113)

球場騙子阿東
對於《WE8》印像最深係盤球及戰術多變化,例如活用L1及L2,就可以使用各種球場「騙術」將對手騙倒,假身成功率高,玩落非常爽,不過玩慣《WE7》,就要多少時間適應,尤其控球經常彈離腳,就最唔習慣。

足球專家健二
今集加強咗聯賽、球員以實名登場,投入感更高,特別值得一讚。另外設定亦方便得多,唔需要好似《WE7》花時間,而預設嘅攻擊同防守陣式好能配合球隊,玩家基本上一開始就能以最強陣容應敵。

單刀直入阿熊
新增嘅按力量傳球係個好設計,不過要用得好絕對唔簡單。今集盤球時不會輕易被人撞跌,適合愛單刀直入攻門嘅玩家表演。畫面真實度亦得到提高,尤其球員動作、空中姿態都非《WE7》可比。