42歲的鄧康榮，日前駕駛電單車返家途中，遇上交通意外，傷重身亡。阿榮乃家中經濟支柱，現突遭逢橫禍，遺下妻子阿娟與三名年幼女兒，生活頓失所依。阿娟連日來為亡夫一筆殮葬費憂心不已，蘋果日報慈善基金即時撥款協助。
「嗰晚警察打嚟話阿榮發生交通意外，我哋趕到醫院，佢喺深切治療部搶救緊，但最後都唔得……」容顏憔悴的阿娟說。
她續歎道：「呢兩日有好多朋友打電話嚟安慰我，我明白始終要接受現實，但心情重好差，成日瞓到半夜醒咗，諗起以前同阿榮一齊嘅日子。𠵱家佢嘅遺體重喺醫院，我一來擔心殮葬費，二來驚自己搞唔掂日後同啲女嘅生活。」
死者鄧康榮日前駕駛電單車沿黃大仙龍翔道中線東行回家途中，與一輛突然從慢線切出中線的私家車相撞，電單車隨即失控衝向快線駛至的拖車，阿榮被捲入車底重傷，其後傷重死亡。
42歲的阿娟曾任職製衣工人，與阿榮結婚十六年，育有三名女兒，現年分別6歲、9歲及13歲，婚後她留在家中相夫教子，阿榮則從事影印機維修技工。
數年前，阿榮為增加收入，轉為自僱影印機維修員，不時駕駛電單車出入工作，一家五口生活尚算安穩。
惟受經濟不景影響，近年生意大幅減少，扣除基本伙食費後，還要應付孩子的教育開支，擔子不輕。為了節省開支，一家鮮有機會出外娛樂消遣，縱然生活簡樸，但阿榮仍不時帶孩子前往公園遊玩，享受親子樂。
「結婚咁多年，我最欣賞佢係一個好顧家嘅丈夫，乜嘢都以屋企為先，早排細路啲學業成績唔好，佢寧願喺生活費方面慳啲，都要留起啲錢畀囡囡補習。」
阿娟續說：「佢放工返嚟，會主動幫我手打理家務，屋企發生乜事我哋都會有商有量，佢喺工作上遇到唔開心嘅事又會同我傾。」
就讀小四的次女阿瑩向記者道出對亡父的思念：「好掛住爸爸，爸爸對我哋好好，往年暑假佢會帶我哋去游水，我喺學校俾人『蝦』，一定會話畀爸爸知。」
蘋果日報慈善基金有見阿娟的經濟苦況，即時從「殮葬專戶」撥款15,000元，助她辦理亡夫的身後事，以解燃眉之急。
捐款編號：C1449
暖流熱線
電話：29908688
傳真：23702192
電郵：
網址：