鄭大班日前大爆行會議員梁振英內幕，話佢係幕後黑手，當年阻住商台續約，振英哥即時否認，重話保留「追究一切法律責任」，點知就一直冇下文。
振英哥出名認真，事無大小，只要一提到佢阿哥個名，佢一定睇得好清楚，然後一有小小唔對頭，一定出澄清，如果有人得閒做統計，行會成員中最多事幹「反應」最多嘅肯定係梁生。
咁講句公道話，一啲同振英哥共事過嘅人都話，梁生好勤力，份份行會嘅文件都睇晒，而且連英文spelling同標點符號都睇埋，次次都指正班AO，真係多得佢唔少。
呢輪中國講溝通，振英哥服從地好似收咗手，早前佢連湯家驊嘅文章都唔放過，話要人哋澄清個腦諗緊乜，你話幾有霸氣，唔怪得有人笑佢當自己係「一國」國鞭，霍老同黑曾未開口，佢搶先表態，呢類高人，少惹為妙。
傳真︰2623-9278
電郵︰