滙控（005）同恒生（011）業績雖靚，但噚日港股整體嘅表現唔算得特別好，恒指早段曾高開達200點，但中段升勢一度收窄到只有50多點，尾段再度抽上，先有155點進帳，期指收12282，低水擴大到75點；港股成交大增，有142億元，單係滙控已佔40億元。
滙恒表現自然係最突出，滙控收118元，升3元；恒生收101.5元，升2.5元。但除滙恒、中移動（941）同幾隻大地產股外，大市整體嘅氣氛，只可以用「麻麻哋」來形容，特別係國企同二三線股，表現疲弱，下跌股成340隻（不計認股證），同大市完全脫節。
恒指收12357，雖然升番上10日線（12298）同20日線（12206）之上，但升勢好局部，只係集中幾隻大藍籌，成個市嘅氣氛唔得，照計升勢暫時都唔會有大作為，前高位12539短期內不易衝破。
國企受中國鋁業（2600）大跌拖累，全面下跌，國指更大跌52點，報4251，一次過跌穿10日線（4328）、20日線（4310）同中期上升軌，50日線（4246）若失守，將下試上月中低位4126嘅支持。
中鋁宣布調低氧化鋁售價12.8%，至3750元人民幣。由於進口氧化鋁價回得頗急，中鋁降價的行動係意料中事，但基於降價後仍比進口貨價（已加上增值稅和進口稅）高出約12%，市場預期中鋁仍需繼續調低售價，因此引發拋售，中鋁收3.7元，跌7.5%，其他資源股受拖累，跌幅3%至6%不等。
威華達（622）一個月前推介過一次，當時股價0.435元，幾日內升上0.51元後先出現調整，但在0.46元水平已有支持，噚日升勢再現，高收0.52元，創出近期新高。近3個月來，走勢形成大圓底，以形態量度升幅衡量，股價有機會重上今年1月中高位0.7元水平。
現年度（12月年結），威華達新電廠投入運營，盈利急升，估計可達1.3億元，升1.2倍，每股加權盈利7仙，以股價升上0.7元計，預測PE仍只係10倍。威華達經供股調整後，每股帳面值0.56元，現時股價仍有折讓，相比華能（902）同大唐（991）以倍計溢價為吸引。
郭兆誠