商台喺一個星期內搞到冇晒公信力，簡直係不知所謂，亦肯定有人已經超額完成指標，嗰啲唔想聽到大班同毓民把聲喺大氣電波出現嘅人喜出望外，因為連商台都一齊砌低埋。
八方有個老友，兩個台都開過咪，佢覺得特別遺憾同可惜，因為比起官台，以前嘅商台始終多小小正氣，敢批評政府，但係𠵱家就乜都冇晒啦，連大班都要打上港台吐心聲，你話係咪世界變。
唔少商台嘅擁躉重越洋打電話返香港大鬧俞琤，話明以後都唔再聽雷霆881，有啲痛心疾首嘅網民更叫今次事件做「俞琤之亂」，唔知同當年「賈后八王之亂」有冇得揮。
好多人都奇怪，以俞琤咁世界女同醒目，冇理由搞成咁，商台嗰句「天地有正氣，聲音擁抱真理，雷霆881，不離不棄，」一晚之間變成城裏大笑話，有人重加上一句，「俞琤炒咗你，」做歇後語。
俞琤一時一樣，歪理層出不窮，一時又指摘大班隨時封咪不負責任，拆掉言論自由嘅平台；一時又親自下令話梁文道身心疲累，迫人封咪，咁樣雙重標準，是非黑白顛倒，指鹿為馬，唔通俞小姐當港人儍咗，任佢老點？
傳真︰2623-9278
電郵︰