俄羅斯Boy'Z唔吼烏克蘭三花
SMASH!!含情互望爆初夜情

有俄羅斯Boy'Z之稱嘅二人組合SMASH!!，喺新碟《Freeway》入面附送嘅DVD片段，已經令人懷疑金髮成員Vlad同黑頭髮嘅Sergey係同志。前日佢哋兩個接受本報訪問時好大方承認唔係處男，Sergey話十四歲已經失身，而Vlad就語出驚人，自爆第一次畀咗隻鴨。

竊竊私語甜入心
Sergey同Vlad第一次嚟香港宣傳，Vlad個老竇同金髮阿媽都有同行，喺訪問期間全程傍住。而Sergey同Vlad嘅關係，真係唔似普通嘅工作拍檔，佢哋兩個人唔止影合照嗰陣好鬼親密，喺訪問期間不時旁若無人咁，兩人將面部嘅距離拉近唔超過十厘米，用俄文竊竊私語，似足小情侶談心。
SMASH!!被問到會唔會好似師姐t.A.T.u.咁做同志組合，但佢哋話冇咁嘅意圖。不過，佢哋好大方承認自己唔係處男，自爆十四歲第一次性交嘅Sergey，好好奇咁問記者：「俄羅斯風氣可能同香港唔同，唔知香港一般嘅年輕人幾時失身？」

鍾意同類型異性
當被問到佢哋第一次嘅對象係男仔定女仔時，一直顯得好傾慕Vlad嘅Sergey話：「梗係女仔啦。」但Vlad似乎有心迴避問題，佢話：「我嘅第一次獻咗畀自己最鍾意嘅鴨，不過呢個問題太私人啦。」而Vlad話佢同Sergey好老友，鍾意嘅女仔都係同一類型，如果同時愛上一個女仔，佢哋寧願由個女仔自己抉擇，而佢哋強調喺俄羅斯好有名嘅烏克蘭三人女子組合NuVirgos唔啱佢哋胃口。
此外，SMASH!!噚日去咗港台接受訪問，因傷而未能完成《赤沙印記@四葉草.2》拍攝嘅Vlad話傷勢已經好咗好多。佢哋今日會返俄羅斯為新碟錄音，重打算年尾或者明年初會再嚟香港。