滙控（005）業績靚，帶動大市上揚，但國企紅籌股下跌，加上二三線股呢排又冇運行，小初同唔少朋友都感到冇癮，只好周圍吼下有冇業績炒。
好似家具股中意控股（1198）剛公布中期業績，盈利上升44%，至4454萬元，股價噚日即時有反應，最高見過4.725元，收4.65元，大升8.1%。
雖然中意股價再創上市以來新高，但偏偏有美資證券行對佢情有獨鐘，調升其目標價至6.90元。對於唔熟大陸家具生意嘅小初，真係覺得難以置信。
經紀黃話，芬佬同分析員睇股票確係唔同散戶，好似大陸超級市場股物美商業（8277），PE一啲唔低，但一樣有人話佢得，主要話新開嘅超市同便利店會提供大量盈利。隻股今日公布中期業績，即管睇吓係咪咁掂？
物美6月初以14.55元批過一次股，以現價12.75元計，重係潛緊水。經紀黃話，主要歸咎於物美收購北京超市單deal遲遲未完成，但有分析員話唔應該睇得咁消極。
慕容小初