一二手市場齊齊推出九成半按揭計劃，令到首期唔夠嘅買家，都可以圓置業夢，部份重係二十零歲嘅年輕人。中原賴作智話，剛有一個二十歲年輕買家，就係用呢個付款法，畀六萬五首期上車。
呢個後生仔近幾日至出嚟睇樓，以高市價一成嘅百三萬，買入上水中心四座高層F，近四百七呎，呎價二千八。
聽講買家中五畢業，做咗兩三年嘢，因為冇首期，一直無法置業，今次有九成半按揭，至可以入市。以二十年供款計，息率優惠利率減兩厘七，月供六千零蚊，比佢租樓多約一千蚊。每個月供款佔佢收入一半。
蘭西無意向年輕置業人士潑冷水，只想提醒大家，要計清楚負擔能力同風險，以免有乜風吹草動就大件事。
仲量聯行報告，東京甲級商廈租金扭轉三年跌勢，次季呎租較首季升半個巴仙，空置率較去年七月高峯一成二回落至五點一巴仙。
租金上升乃因經濟轉趨樂觀，公司與金融機構擴充及轉租較佳物業。
蘭西記得，日本國稅廳剛公布，地價連跌十二年，今年初較去年初跌五巴仙，現時寫字樓租金好轉，相信對地價多少有刺激，話唔定就快止跌回升。
今年出現三種透過蚊隻傳播嘅病毒，杜絕蚊患刻不容緩。富城管理嘅逾千座大廈，推行三個月全「城」滅蚊大追擊，與百萬業戶齊手滅蚊。
行動包括成立專責小組，每日最少一次，巡查屋苑範圍內是否有積水，一旦發現，便立即清除，又喺蚊蟲滋生嘅黑點，加強噴蚊油及放置蚊沙。同時保持屋苑內所有溝渠暢通無阻。
小組又會向業戶派發防蚊錦囊小冊子，及舉辦講座，加強防蚊意識。
地產代理搵大錢，吸引唔少新人入行，美聯物業大學堂，就為呢班新人開辦「營業員牌照課程」，今年已經開咗六班，報讀嘅有二千五百多人。
美記計劃本月再開多一班，原因梗係希望佢哋幫手搵生意啦。
另外，美聯美善會，日前同基督教勵行會，為四十幾個小朋友舉行燒烤營，等班小朋友可以有得食有得玩，過一個開心嘅暑假。
蘭西
電郵地址：
