賓架Y請客，話係為張總夫婦接風，召左丁山做陪客。星期六的晚上，到太古坊Butterfield's食中菜，少有也。呢間Club平時好似冇乜老友去，如果唔係在太古坊啲大廈返工，嚟呢個會所做乜？我哋成班都係中環人，賓架Y點解唔喺銀行家會所請客呢？佢話此會所現由半島負責飲食部，值得試吓喎。
因交通關係，未夠晚上七點就到咗太古坊，為時尚早，於是沿糖廠街行一個圈，所有食肆都空空洞洞，睇嚟太古坊在假日期間，冇人返工，呢度啲酒吧食肆都係白交租，情況曳過中環好多。行街唔行得咁耐，與老婆走入一間CafeE飲果汁，叫咗兩個小食，其中一味係西班牙式腸仔，鹹到飛起。埋單盛惠二百七十，肉都痛晒，以後都唔慌會再行入去。
上到Butterfield's餐廳，空空如也，主人家未到，睇吓張菜單，咦，好隆重噃，唔似係老朋友坐埋食餐飯咁嘅格局，點解呢？謎團未解，眾人駕到，賓架Y與公子L各拎紅酒，合共五支，加一支白酒，請張總決定先後次序。本來飲紅酒通常係要由稍佳飲到最佳，但張總乃念左丁山唔飲得，決定飲咗支最好嘅先，以免左丁山走寶。張總真係唔話得，識飲識食之外，更識照顧他人。張總遷居上海之後，眾人皆懷念佢嘅廚藝，公子L與詹翁都爭住請張總借用佢哋嘅廚房，等眾人大快朵頤。張總宣布九月回港小住喺城大教書，到時大家都會昅到實，睇吓邊個請到張總回家整番十款八款正斗私房菜先。
食完炒飯之後，貴賓廳突然燈光暗晒，侍應推門而入，推車上有蠟燭、蛋糕，眾人恍然大悟，立即齊唱生辰快樂，賓架Y太太話：「唉吔，正話出門，佢都話係請張總食飯咋！」老公心細如塵，抵錫啦。