商業電台近月上演緊一套香港播音史上最精采嘅廣播連續劇，劇情日日新鮮，呢幾日直情係高潮迭起，睇見名嘴一個又一個倒下，繼大班、毓民、大飛之後，連商台顧問梁文道同營運總裁蔡東豪都無可幸免，一個無端被屈「身心疲累需要休息」被迫封咪，另一個就同老細傾唔埋欄，俾人即時終止合作關係。
噚日商台情勢緊張，惟獨股壇名嘴「陸叔」陳永陸佢一個鬼咁風騷。陸叔朝早返工時，八方問佢對封咪事件有乜睇法，佢就好興奮咁舉手高叫「我個節目唔會停，財經永遠存在，搵錢永遠存在」當佢開完員工大會離開商台時，有記者問佢對言論自由有冇擔憂，佢就話「滙控今日有啲跌呀，呢個就要擔憂啦」。係九唔搭八，定有心射歪？
電台需要名嘴，就正如人類需要空氣一樣，眼見名嘴買少見少，講政治又鬼咁敏感，商台於是改變策略勁捧財經界名嘴。商台喺下午發新聞稿宣布，將會畀陸叔喺周六主持多一個全新音樂節目「第陸類接觸」。據八方打探，呢個特備節目由許冠傑現象引發，派陸叔訪問五位嘉賓，談論七十年代嘅事物，包括音樂、人生等等。五集嘉賓分別為馬時亨、許冠文、鄺其志、譚詠麟、廖秀冬等。
其中馬時亨和鄺其志已經錄音。馬時亨談窮，陸叔就話以前人人以窮為榮，港大較有錢嘅人都不敢認，要扮窮，例如廖秀冬出身小康之家，亦唔敢認。馬時亨第一次出糧買咗一部黑白電視機，放在上格床，全家人要「岳」高頭睇電視。節目中，馬時亨點了「鐵塔凌雲」和「沉默是金」。
鄺其志就話細時英文不好，但喜歡唱歌，又要威，於是惟有狂念歌詞。節目中點了一首歌「啼笑姻緣」，佢說此歌很有代表性，因為係第一首劇集廣東歌；近期又有一首「啼笑姻緣」，係陳小春唱嘅，鄺其志個仔介紹佢聽，佢一樣識唱。
（圖）「陸叔」陳永陸噚日朝講咗句「我個節目會繼續做，財經永遠存在，搵錢永遠存在」，商台晏晝就出稿話會畀多個音樂節目佢做，係商台論功行賞，定係名嘴走吓走吓，搞到電台冇人呢？ 區民傑攝
傳真︰2623-9278
電郵︰