漫畫家幾米早排喺大陸被人叉頸扯髮追債，在潮圈掀起一陣騷動，好多潮Fans不禁問句脫俗嘅創作人點解都捲入邪惡嘅錢債糾紛？潮界金牌經紀大隻標對呢件事有咁嘅睇法：「創作人亦係人，佢哋都要搵食！做創作人冇月薪、冇雙糧、冇勤工獎，背後辛酸冇人知㗎，所以創作人會趁當紅時期不斷推出好多相關PRODUCT，例如潮玩、T恤、畫冊等，正所謂好天斬埋落雨柴，搵得幾多就幾多。至於半紅不黑嗰啲就慘囉，其實佢哋想四出搵生意，但礙於要保持創作人嘅清高態度，唔可以太過出面，就算接到生意都要扮唔志在，耐唔時重被人拖數㖭，你知喇，作為創作人又點好意思上門收票？其實講到底香港嘅創作圈缺乏經理人制度，外國好多創作人已有經理人代為處理財政同接生意，例如SILAS背後就有間好完善嘅經理人公司。香港人怕蝕底，唔願被人抽佣，唔肯請經理人，有啲甚至只搵老婆兼職代勞，難免唔夠專業。所以早在兩年前開始我已積極開拓巿場，如果佢哋肯尊重合約精神，咁大家就容易搵食囉！」大隻標咁樣講，莫非有人無遵守合約？
主持人：大食Jack
八卦熱報：