那英懷孕六個月一直深居簡出，直至早排佢聯同王菲及趙薇，幫經理人邱王黎寬慶祝生日，個大肚look先喺北京曝光。
原來那英為咗迎接佢同老公高峰嘅愛情結晶品，早排用咗差唔多五百萬人民幣，買咗位於北京順義區天竺鎮、有五年樓齡嘅麗斯花園其中一幢屋。嗰度係一幢獨立屋連車位，面積三百一十八平方米，每平方米售價計番都要成一萬六千蚊人民幣。屋苑內嘅設備都算唔錯，有會所同泳池，管理費每個月要成二千五百蚊人民幣，一啲都唔平，不過環境咁好，啱晒第時同小朋友生活。
據售樓處嘅職員透露，麗斯花園內有唔少內地明星住客，由於那英嘅新居接近路口保安站崗，所以成日都有保安員巡邏，治安唔錯，而那英嘅好友王菲個新男友李亞鵬，所住嘅麗高王府，就喺麗斯花園前面，所以以後王菲要探那英，自然就方便好多！
林熙蕾近日喺上海拍攝新劇《搖擺女郎》，佢俾周刊偷拍到同內地已婚富商龍長生咀嘴同錫手，最後對方交咗張類似鑰匙卡嘅嘢畀林熙蕾。噚日林熙蕾回應話：「他是我一位女性朋友的朋友，我朋友失戀到上海找我，透過她我才認識龍先生。他拿給我的不是鑰匙卡，是介紹上海有哪些好吃的餐廳導覽卡，他親我的手，也是故意鬧着玩的，根本沒有開房這件事。」
許冠傑（Sam）八月嗰十場個唱今晚開鑼，噚日佢一早去紅館綵排，而佢老婆、阿仔懷恩同懷谷、阿哥許冠武同許冠英亦陸續到達。原來噚日係懷恩結婚周年及許冠英生日，所以佢哋順便喺紅館慶祝。阿Sam又捐咗部份四百蚊飛畀母校九龍英華書院，作為母校嘅音樂發展基金。而為咗叫觀眾着豹紋衫入場，重特別設計咗啲漫畫。
日本萬人迷木村拓哉日前喺日本嚟香港，聽聞係為咗幫《2046》重拍一張海報，雖然之前喺康城影展曾經傳木村唔妥導演王家衞，但今次佢嚟香港影海報，我馮仁昭覺得佢哋嘅關係應該唔係太差。木村噚日住喺港島香格里拉酒店，好多記者知道佢嚟咗，當然一早喺酒店門口等佢啦！而《2046》去完康城參展之後，早排重要喺上海補戲，認真長拍長有！
講開《2046》，套戲將會喺年尾上映，內地同日本已開始做宣傳，日本嘅宣傳海報以王菲同木村為主，其中一張重用咗王菲嘅機械人造型，證明佢喺日本嘅吸引力大過章子怡同梁朝偉。
套戲喺康城參展時，張曼玉喺螢幕一閃即逝，但為咗迎合內地觀眾，內地版嘅《2046》會加重曼玉戲份至十五分鐘，相信唔同嘅版本都有唔同嘅吸引力。
