踏入暑假,富士已急不及待一口氣推出6、7款入門級DC,搶攻最大消費市場,就連香港代理都緊貼日本派貨時間,搶先推出行貨,擺到明搵真銀。其實富士並未遺忘一眾發燒級用家,講咗兩年嘅高階DCS3Pro,終於有新料發放。
機身跟S2Pro一樣,以單鏡菲林機嘅F80作設計藍本,最重點改良係加入1,200萬有效像素SuperCCDSRII,SR技術原理為分開光、暗區域嚟感光(各600萬像素),太光或太暗訊號將分開「S」同「R」CCD嚟擷取,遇着大白天攝影,藍天白雲得以保留之餘,被拍人物亦可保持明亮,唔會變咗「黑面神」。而第二代SR更可有效減低暗位噪訊,令到相片光源更均勻。其他改良地方,主要係屏幕由1.8"提升到2"機身亦加入直度快門掣,想輕鬆啲影直度相,都毋須另購直度手柄咁麻煩。
S3Pro暫定今年十月頭推出,預計售價為26萬日圓(約港幣$18,500),以1,200萬有效像素及高階專業機嚟講,的確幾吸引。
記者:徐影龍
相關網址: