上屆喺皇馬同英格蘭都食白果嘅碧咸，為咗喺今屆重振聲威，決定將手頭上嘅廣告贊助合約由十一份減到得番五份；但我求大俠就覺得，係佢有感自己人氣跌，於是主動出擊，費事俾人cut咁瘀。
碧咸上屆幫唔到皇馬攞盃，又喺歐國盃兩次射失十二碼令英格蘭喺八強出局，重衰到俾人揭發同前助手盧絲有路。由於佢個形象嚴重受損，有傳多間公司好似馬莎百貨咁，唔打算同佢續約；唔知佢係咪收到風，於是反客為主，以想專心踢波為理由而減少啲廣告贊助合約。
碧咸雖得番五份約，但加埋喺皇馬嘅人工，每年重有成二千五百萬鎊（約三億五千五百萬港元）落袋。佢係足球員而唔係明星；加上正要挽救足球事業，所以放多啲時間落足球度，亦係正確決定。講真如果佢幫皇馬同英格蘭攞到好成績，人氣肯定反彈，到時大把名牌公司搵佢簽廣告贊助合約啦！
喺八十年代末同九十年代初叱咤意甲聯嘅拿玻里，因為負債約七千萬歐元（約六億五千六百萬港元），喺星期二正式宣布破產，好可能貶降丙組，認真慘情，我求大俠都覺得好可惜。不過，惟有希望佢哋好似財困嘅費倫天拿咁，只係用短短嘅兩年就回升甲組，再戰江湖。
唔知係咪見到另一位老將薛洛尼決定唔退休住、同希臘球會伊拿克里斯簽約一年嘅影響，意大利著名老將巴治奧突然話唔想退休住想多踢一季，而佢加盟嘅球隊重好可能係博洛尼亞或者費倫天拿㖭！佢話：「有唔少球會向我招手，不過喺我答應復出前，我要清楚自己嘅狀態。」
踢緊安德烈治嘅瑞典國腳中場威武臣嘅經理人真係冇得頂，竟然話有兩間英格蘭、三間西班牙、四間意大利、五間法國球會對佢有興趣！求大俠真係好少聽到有球員同時俾咁多間球會垂青，呢位經理人想讚自己件貨，都唔使咁誇張啩，咪俾我睇死最後都要留番喺比利時搵食！
意大利當地有報道話，英國天空電視（Sky）準備向首都球會羅馬注資一億英鎊（約十四億二千萬港元），作為未來三年贊助費。我求大俠重知道呢間英國傳媒公司，同時係今季祖雲達斯贊助商；睇嚟佢哋呢次「入侵」行動，又會同當地幾間大公司如RAI等展開播映權惡鬥！