滙控（005）盤數靚，隔晚紐約滙控股價折合119.43元。滙控以119元裂口開出，C輪隻隻彈到半天高，好蝦人買。例如所提嘅9976高開40仙，升幅48%；9783重厲害，高開87仙，高開64%。
滙控埋單118元，比開市跌1元，比前市升3元。早段買C輪嘅坐艇。9976埋單價33.5仙，升24%，但早段摸頂入貨嘅已要蝕16%；9783埋單價76仙，單日升幅仍達43%，但早段摸頂入貨嘅則要蝕13%。
滙控績佳，未來仍有升幅，不過最好等消化一輪，先至揀個別C輪炒吓。
恒指C輪9773：恒指升155點，其中107點係滙控所帶動，16點係恒生（011）所帶動。恒指C輪9773係熱門貨，高開10.8仙，埋單9.7仙，單日升幅14%。隻輪9月尾夠鐘，溢價1.4%，槓桿率23.2倍（有效槓桿率14.4倍），引伸波幅20.4%。睇數據，好有吸引力。要留意滙控與恒生分別喺18號同20號除息1.01元與1.10元，一共扯低恒指42點，所以隻輪溢價實際高過表面數字少少。稍等一吓，等平少少至買9773。
中銀C輪9211：中銀（2388）兩名副總裁有事，股價原地踏步收13.30元。滙控有聲有色，中銀估計亦睇得吓，人事新聞嘅嘢估計冇乜影響。買中銀C輪，揀9211，年底夠鐘，輪價21.1仙，溢價2.3%，槓桿率6.3倍（有效槓桿率4.8倍），引伸波幅34.8%。中銀C輪中，呢隻數據比較實際。
章盛