樓市交投唔係咁好，低價成交多，在此氣氛下，估唔到重有買家願意追價，金豐易居崔佑興話，一名回流客，喺三個鐘頭內，兩度追價共三十萬元，購得西半山列堤頓道嘉和苑單位。
呢個客，回流本港兩個月到，先後睇咗三十個單位，最近睇嘉和苑高層B，九百一呎，鍾意佢中西合璧裝修設計，同埋無敵海景。
崔佑興話，兩個禮拜之前，嘉和苑原本有另一個高層，呢個買家當時因為要諗一晚，結果俾人捷足先登，今次見再有放售，梗係嗱嗱聲啦。今次作價比起兩周前嘅成交價重低少少，計落追完價都有着數，真係塞翁失馬。
好耐都冇蒲頭嘅前亞姐施綺蓮，市場人士話，最近佢阿媽將西貢物業，以千二萬賣畀西貢海灣酒店洋業主。
物業由三幢三層高村屋組成，喺西貢景星廣場斜對面。施綺蓮阿媽揸咗好耐，之前租出去做意大利餐廳，點知個租客欠租，搞到佢去追租時大鬧餐廳，差啲上埋差館。唔知係咪因為咁，所以決定割愛。
至於買家，係近年積極喺西貢買嘢嘅澳洲籍投資者。宏億置業方國珊話，佢買嚟諗住自己開餐廳。物業五千呎，呎價二千四。
約人一齊玩或做嘢，好多時都會搵啲地標做約定地點，唔驚搞錯，好似銅鑼灣時代廣場門口大電視、尖沙嘴碼頭五支旗杆等，但係相約喺旺角又點算呢？
遲啲就唔使擔心嘞，因為鷹君朗豪坊，會擺放三十呎高嘅雕塑「Happyman」，咁第日一講就知邊度啦！
聽鷹君講，因為個雕塑又重又大，所以要分割搬運，到現場再砌番埋。
呢啲地標，好容易聚集人流，咁商場生意自然受惠啦。鷹君果然有諗頭。
金鐘遠東金融中心近期錄得多宗成交，屋之島董事總經理黃志強話，中國旅遊協會喺香港註冊嘅非牟利機構，亞洲旅遊交流中心，原本租用遠金二十樓近二千呎單位，最近轉租為買，成為業主，購入價逾千萬，每呎近五千四。呢個機構今次買寫字樓嘅資金，相信應該係由內地母公司畀。
另外，遠金二十七樓四千二呎單位，上月以每呎七千八摸出，兩個月升值五巴仙。
租客喺同一個屋苑置業不時都有，沙田第一城最近有一單，似乎冇乜特別，但利記周德龍話，呢個買家原來九九年買過第一城三九五呎
最近見樓市回落，六月佢四出睇樓，結果用百四萬，買入十六座低層B，逾五百六呎，每呎近二千五，比市價低一成。聽講，今次買樓係因為住慣呢區，同埋方便小朋友返學。
周德龍話，出貨業主八二年以八十二萬購入，諗住換樓，又已睇啱心水，所以肯平買平賣。
蘭西
電郵地址：
