住在紐約的友人告訴我，以前的紐約市很黐線：蘇豪區是九反之地，莫說在深夜，就算在日間獨個兒逛街也是一件挺危險的事。土產藝術家聚在街上盡情展覽自己的傑作，夢想有朝一日碰上伯樂，將其名字變成國際品牌，飛上枝頭變鳳凰。地鐵車廂及大廈外牆全是街頭繪畫師的畫紙，滿街滿巷滿地鐵都是七彩繽紛的塗鴉，其中有不少今天已成為大師。
今天，蘇豪區的棄置單位已由政府接收，一方面鼓勵土產藝術家搬入單位內，將該區發展成藝術味濃厚兼高地價的區域，另一方面亦不再准許藝術家在街頭擺檔。塗鴉不見了，沒有了豐富色彩的外衣，列車顯得格外殘舊。
紐約政府用了大量金錢增加警力，令紐約成為一個更安全的城市，經歷了911之後，紐約人更是份外團結，紐約友人說：「紐約實在比以前好住得多。」但作為遊客，紐約市那份鮮明的色彩似乎已褪色，變成跟其他美國主要城市相差不大。
「點解你會咁諗㗎？以前真係唔可以喺蘇豪區咁行嚟行去㗎。」紐約友人有點不服氣地說。「但係蘇豪區除咗行吓街、買吓嘢之外，真係冇乜好做。」「冇嘢做？你擘大眼睇吓街上幾多『摸特拉』？」友人邊講邊指住對面馬路。「乜嘢『摸特拉』？啊，你嘅意思係模特兒。」「咪『摸特拉』囉，你睇吓幾多？幾高？全部都係國際級㗎！」
於是，大部份時間都站在蘇豪街頭揸住杯咖啡睇「摸特拉」。