精明消費：<br>對應07數碼廣播顯像管電視畫面最靚精明消費：
對應07數碼廣播顯像管電視畫面最靚
今年7月初政府正式宣布本港兩間電視台，可在07年開始數碼廣播（HDTV），為觀眾提供高解像、環迴立體聲等多功能電視節目。所以𠵱家換電視，不妨換定部可以對應數碼廣播的電視，事關據政府預計08年數碼廣播將會覆蓋全港75%，而去到2012年更會全面終止現有的模擬廣播。如果唔想得物無所用的話，不論換傳統顯像管電視、Plasma抑或係LCD，最緊要睇睇佢哋係咪可以對應數碼廣播。
記者：張穎麟
攝影：周旭文
Model：Cody
顯像管電視畫質靚
咪睇小傳統的顯像管（CRT）電視，其實佢一樣可以對應數碼廣播，而且由於發展技術成熟，所以畫面更比LCD同Plasma靚。唯一缺點係體積比較龐大，而暫時只有29吋或更大型號才兼容數碼廣播功能，細Size機就暫時未有。
正斗推介：細緻畫面超班表現
型號：新力KV-HZ29M90
畫面尺寸：29吋
最新一代的WEGAEngine兼容了數碼廣播，更內置了寬頻視像放大器同高壓影像調節器等技術，能確保高解像的亮度、畫面對焦範圍等訊號，能在電視機上百分百呈現，將失真減到最小。畫面的細緻程度，遠超其他CRT機種、Plasma，以至LCD。
售價：$8,980（送DVD機）（a）
最齊Function機種
型號：LGRT-29FB20RB
畫面尺寸：29吋
有齊對應數碼廣播、100Hz影像掃描、ProgressiveScan順序掃描、雙調諧畫中畫同Nicam等齊料機種。其DigitalEYE技術能感應四周環境光度，而對畫面光暗作出調節，令雙眼更舒服。
售價：$5,480（b）
打機睇碟一樣咁靚
型號：東芝29SZ8UE
畫面尺寸：29吋
東芝一早已推出對應數碼廣播的電視機，最新的CityFace已對HDTV技術充份掌握。它的超數碼逐行掃描系統，再加上記錄畫面、線域的暫存記憶體，能減少播放動態畫面時，斜線變成鋸齒形的問題，就算打機又或睇DVD都一樣咁靚。
售價：$4,980（水貨）（b）
配套最齊：34吋HDTV選擇
型號：JVCHV-Z34L1
畫面尺寸：34吋
無可否認，大部份對應數碼廣播的電視機都以29吋為主，34吋的選擇確實唔多，幸好還有致力推動HDTV的JVC。呢部DynaPix，除了可將畫面訊號失真補償，更兼容JVC已全面推出的HDTV制式數碼攝錄機、DVD錄影機等，配套齊備。
售價：$11,800（b）
傳統畫面都變HDTV質素
型號：飛利浦29PT9420
畫面尺寸：29吋
如果你想早一步欣賞接近數碼廣播的畫面，不妨考慮飛利浦的PixelPlus。事關佢擁有飛利浦自行開發的EagleIC晶片，可將傳統電視畫面由720×525像素增加至2,048×1,050的HDTV水平。其獲獎無數的DNM技術，能抑制動態畫面的震動，令影像更穩定。
售價：$9,490（f）
國產高清電視
型號：創維CTV-29T68HD
畫面尺寸：29吋
不要以為國產機未有技術生產高清電視，呢部創維就已擁有呢個技術。佢除了對應HDTV的1080i外，同樣擁有ProgressiveScan順序掃描、100Hz影像掃描同國際線路功能，美中不足係呢部機冇Nicam。
售價：$3,880（b）
Plasma選擇多
由於擁有32?1吋及16:9的超大畫面，所以最適合對應數碼廣播中的闊屏幕畫面同多角度視角效果。無可否認，市面上大部份的Plasma，不論尺寸、型號都已經可以對應數碼廣播，因此選擇明顯較顯像管電視多。
耐用體貼集一身
型號：日立42PD5000TA
畫面尺寸：42吋
為了迎接數碼廣播的來臨，呢部日立電視採用的ALIS屏幕，就做到業界最高的1,100亮度，而壽命更長達60,000小時。呢部機擁有的數碼色彩處理，可讓你根據喜好調校畫面上任何一種顏色，體貼用家。
售價：$39,800（送DVD錄影機）（a）
經濟抵玩：46吋HDTV感受
型號：雅佳PDP-46TS2
畫面尺寸：46吋
想享受46吋的HDTV畫面，呢部雅佳的Plasma絕對抵玩，其畫面夠晒大外，價錢亦比唔少42吋機平一大截。雖然像素得852×480唔算好高，但一樣做到160度觀賞角度、1200:1對比度，更有埋Nicam，功能都算齊備。
售價：$28,888（送DVD錄影機）（a）
直接睇埋數碼相
型號：新力KE-MX42A1
畫面尺寸：42吋
同樣是加入了WEGAEngine技術，令影像雜訊減到最低，呢部Plasma的42吋16:9畫面，給予更逼真的電影感。增設了MemoryStick插槽，可直接在Plasma欣賞數碼相片。
售價：$39,990（送DVD錄影機）（a）
5年特長保用
型號：LGRT-42PZ60
畫面尺寸：42吋
Plasma的維修率比傳統的CRT同LCD電視機都較高，所以LG就提供首3年免費保養，後2年特價保養服務，更包齊屏幕保護、零件同上門維修。而呢部機亦可做出1,024×768的像素同1,200:1對比度，同唔少日本牌子看齊。
售價：$39,800（另送DVD錄影機）（a）
時刻保持靚畫面
型號：飛利浦37-PixelPlus
畫面尺寸：37吋
就算係專業玩家都未必可以一下子調校出最靚的畫面，所以呢部Plasma就備有ActiveControl功能。自動分析電視的訊號，之後便會對色彩、對比、雜訊、清晰度等作出最佳調整，確保可以欣賞最佳畫面。
售價：$26,880（另送DVD錄影機）（a）
最高對比度
型號：樂聲TH-37PA20
畫面尺寸：37吋
一直以來都以最高對比度而揚名的樂聲Plasma，新推出的37吋型號，仍可以提供4,000:1的超高對比度，畫面份外分明。再加上多模式畫中畫功能，無論係欣賞數碼廣播、DVD定打機都唔怕同屋企人爭電視。
售價：$36,800（f）
一體設計夠方便
型號：新力KE-32TS2E
畫面尺寸：32吋
雖然呢部Plasma欠缺SONY最自豪的WEGAEngine，畫面未算最靚，但其一體化設計卻夠晒方便。纖巧的機身內，已內置電視調諧器、環迴立體聲揚聲器等設備，不需再搵地方安置電視調諧器同喇叭，慳地方得多。
售價：$23,500（b）
影院逐行掃描
型號：三星PS42S4S
畫面尺寸：42吋
大部份對應HDTV的設備都只在於接收訊號，但三星呢部Plasma卻特設影院逐行掃描系統，可以精密分析HDTV同DVD的視頻訊號，之後再加插格數，以減少畫面的模糊及壅塞，構成最完美逼真的畫面。
售價：$36,800（另送DVD錄影機）（a）
LCD最合香港家居面積
LCD電視的畫面比Plasma靚，但又不及顯像管電視。不過勝在尺寸夠細，大至32吋，細至20吋也一樣可以對應數碼廣播，最適合香港家庭面積。可惜係生產成本較高，定價亦是三者中最貴。
睡房良伴：機仔細細夠慳位
型號：聲寶LC-20B6H
畫面尺寸：20吋
近年全力開發LCD電視的聲寶，一向以高亮度為賣點，呢部最新推出的LCD，同樣擁有430cd/m2亮度，再加埋可根據外來光線而調校亮度的OPC系統，唔怕被其他光線令畫面變暗，更新加入可接收及顯示HDTV的功能。
售價：$11,980（d）
克服LCD兩大難題
型號：日立28LD5000TA
畫面尺寸：28吋
為了克服LCD電視觀賞角度較少的問題，日立呢部LCD電視便採用AS粁PS技術，令電極排成水平位置，將觀賞角度增加至176度，比其他LCD優勝。另外它亦採用了Overdrive技術，將畫面傳送速度提高至13毫秒，減少殘影，提升畫面質素。
售價：$23,800（另送數碼相機）（a）
接駁端子夠晒多
型號：ComeMonTM300W
畫面尺寸：30吋
唔好以為韓國牌子的LCD電視會較輸蝕，呢部ComeMon的LCD電視，就以特多端子為賣點，除了對應HDTV的DTV端子外，更有埋D-subRGB、色差同RGB，一次過接駁所有影音器材，都唔怕接駁端子唔夠。
售價：$17,980（a）
3D修補減少「狗牙」
型號：BenQDV2680
畫面尺寸：26吋
當大部份LCD電視最多都只係得500:1對比度時，BenQ的LCD電視卻做到600:1的超高對比度，看起來無論色彩定畫面層次都銳利得多。不得不提係其3D動態邊緣修補濾鏡，有效將「狗牙」修補，特別是打機時會覺得順滑得多。
售價：$16,880（e）
細畫面高亮度
型號：飛利浦300WN5QS/97
畫面尺寸：30吋
飛利浦的LCD，30吋畫面，亮度卻高達500cd/m2，無論係陽光同燈光，都唔易影響畫面光度，讓人睇得更舒服。佢共有兩組色差輸入，反而普通Video同S胘ideo只係各一，較適合全面數碼化的用家。
售價：$21,990（f）
一次過睇12個節目
型號：JVCLT-Z32S2
畫面尺寸：32吋
JVC的LCD電視，唔單止可接收HD1080i、HD1125i50/60Hz制式數碼廣播，兼容性特高。更具有多畫中畫同圖像、文字雙畫面功能，既可將畫面分為12格一次過觀看不同節目，又可以檢閱節目的文字資料，完全發揮數碼廣播的優點。
售價：$32,800（c）
甚麼是數碼廣播？
數碼廣播又稱高清電視（HDTV），由於電視訊號改用不連續的資訊數元傳訊，所以完全有別於現行利用模擬方式的連續波廣播。單是畫面解像度就由模擬的720×576激增至最高的1,920×1,080，逼真程度毋庸置疑。另外，數碼廣播亦可提供其他服務，例如闊屏幕畫面、多角度視覺效果、隱蔽式字幕、電子節目指南等，功能比DVD有過之而無不及。而接收方面，數碼傳送亦可減少鬼影、干擾等問題，令接收清晰、穩定得多。
售賣點：
（a） 中原電器 27572088
（b） 華仁會 23980280
（c） JVC 27328220
（d） 聲寶 28229435
（e） 新盈 26493833
（f） 香港電業城21773828