早前北上幫中央做咗場「溝通騷」嘅岑建勳，噚日走去幫劉千石助選，因為兩個人都講同中方溝通，好啱傾，不過岑建勳講咗啲話，令中央有點兒難堪，佢投訴上次發嘅只係一次過回鄉證，又話會好快發永遠回鄉證，但之後就冇咗下文。阿岑聲言，如果再唔畀佢，佢會再發難渣。講到呢度，手舞足蹈嘅岑建勳一時激動，一手將八方嘅錄音機掃咗落地打爛。
另外，陳婉嫻噚日又去報名，搵埋一位二十四歲嘅後生仔鄧家彪排名單第三位，彪仔中大社會學系畢業，𠵱家係工聯會嘅受薪職員，因為佢形象突出，重將頭髮gel成碧咸頭咁（圖），一出現引起一陣哄動，嫻姐話搵佢合作，係因為想聽年輕人心聲。嫻姐嘅團隊唔知做乜，唔肯將彪仔嘅手提電話號碼畀記者，而彪仔亦口多多講錯嘢，指住班女記者，話唔公開電話，可能係團隊唔想佢近得太多女色，至於搵男記者搵佢，彪仔竟話「更加唔好」，激到班記者紮紮跳。
又嫻姐言出必行，選舉單張要用放大鏡先見到民建聯三個字，真係接近完全消失。
傳真︰2623-9278
電郵︰