雖然東亞銀行（023）業績令一眾分析員跌爛眼鏡，但好彩滙控（005）業績靚到你唔信，中期盈利升成55%，真係令唔少銀行股fans笑逐顏開。
經紀黃心情亦好靚，皆因佢上周力捧嘅永旺（984），噚日股價繼續創新高，最高見過7.90元，收7.50元，升8.7%。
另外佢在上周末勸大家莫高追嘅YGM貿易（375），噚日股價當真回得甚勁，大跌10.87%，收8.20元，成交股數199萬股，金額1712萬元。
經紀黃話，呢個就係有芬佬捧場同短線投機嘅分別，唔排除YGM將來會同樣獲芬佬垂青，但現階段似乎仍有好多工夫要做，才吸引芬佬注意。
另外，近排一直回購股份嘅生命科技（1180），噚日失驚無神玩笨豬跳，最低跌過落7.8仙，收9.2仙，大跌37.4%，成交股數多達2.99億股，金額2805萬元。
經紀陳引述路邊社消息，據聞唔係公司或者大股東有事，而係有個投資者唔掂要沽貨所致，但小初睇佢沽得又急又狠，實在幾得人驚。
慕容小初