女人湯圓𠝹盡老中青
祖迪羅一夜情搞出人命

英國男星祖迪羅（JudeLaw）自從同老婆莎迪霍絲（SadieFrost）離婚後，舊年開始同新片《Alfie》拍檔施安娜美娜（SiennaMiller）拍拖，佢哋喺戲裏戲外都好親密，不過由於祖迪羅係演一個女人湯圓，所以係女人佢都啱。

重拍米高堅舊片
其實《Alfie》係重拍英國殿堂級男星米高堅（MichaelCaine）喺六六年主演嘅同名電影，所以祖迪羅同舊版入面嘅米高堅一樣，係扮演住喺紐約嘅英國人Alfie，呢位仁兄名副其實係追女聖手，女友多不勝數，一夜情對於佢嚟講係等閒事。

享受做花花公子
戲入面祖迪羅同好多女人有過一手，除咗有青春少艾嘅施安娜，另外重有徐娘半老嘅蘇珊莎朗頓（SusanSarandon）以及相當有女人味嘅瑪莉莎杜美（MarisaTomei）等等。原本祖迪羅一直都好享受佢嘅花花公子生活，但佢其中一個女友忽然大咗肚，咁究竟會唔會令佢改變自己嘅生活方式呢？
另外，二十二歲嘅施安娜片約不絕，佢喺新片《LayerCake》入面淨係着住內衣褲同男拍檔肉搏連場後，今個月佢又會同𠝹女王希思萊杰（HeathLedger）去威尼斯拍《Casanova》，男友祖迪羅都唔知應該戥佢開心定擔心。