張惠妹俾內地反台獨人士視為泛綠藝人，佢喺北京舉行嘅演唱會亦喺一片抗議聲中結束。原來早前佢接受中央電視台《新聞會客廳》訪問，自爆當年喺陳水扁總統就職禮上唱「國歌」並非自願，阿妹話：「當時我覺得這些事情已經發生了，而且並不是我自己做的決定，但我必須要承受這個包袱，因為我是張惠妹。」
有消息話當年台灣總統府經阿妹所屬豐華唱片請阿妹去唱「國歌」，阿妹一直唔答應，但唱片公司同經理人公司冇人敢拒絕總統府，叫阿妹要推就自己推，佢喊咗成晚，第二日雙眼紅腫去獻唱。
不過訪問之後，有人以為阿妹承認去表演係做錯咗，前晚佢返台灣時好激動咁話：「做錯？我好像沒說過我做錯了吧！你們從哪兒聽來的？」
噚日馮仁昭聯絡咗當時負責阿妹通告嘅經理人蕭志文，佢話：「只要不影響阿妹的發展、賺錢，只要是對她好的，她怎麼說，我們就怎麼做！」不過有人質疑藝人表演前都要綵排同練歌，唔係話上台就上台，藝人唔做迫唔嚟喎。
劉青雲噚日去到港台接受陳敏兒訪問，佢話覺得孔慶翔（WilliamHung）喺呢個年代好有代表性，覺得佢做到嘅嘢好多人都做唔到，好似佢明知個節目係玩佢亦都盡力去做。青雲重話覺得大家笑William騎呢好唔啱，青雲最後重叫時下年輕人應以William為學習榜樣。
由張衛健同謝霆鋒主演嘅《小魚兒與花無缺》，喺北京拍攝期間，有不法分子聲稱只要畀三千二百蚊，就可以安排到同張衛健、謝霆鋒做對手戲，吸引好多人應徵，重收晒錢簽埋約。部戲嘅導演同副導演公開表示絕無此事，佢地冇要求中間公司收錢安排臨時演員，內地公安𠵱家查緊件事，阻止不法分子再斂財。
MaggieQ𠵱家喺新加坡拍緊電視電影《融之堂》，而新加坡藝人范文芳就會做佢媽媽，分別由美國演員同德國演員做佢哋嘅男朋友。呢套電影主要講述佢哋兩代人嘅愛情故事，MaggieQ日前就着住旗袍參加開鏡拜神嘅儀式，佢笑住話：「每天要穿緊身旗袍工作十多小時，一點也不好受。」
