SanDisk處女下海首部MP3機靚爆登場

賣記憶卡賣到出晒位嘅SanDisk，幾乎制霸所有制式記憶卡，可算係威到盡，最近重延伸記憶卡用途，推出全球最細嘅USB手指，以及分體式MP3機，賣相重拍得住一眾大廠㖭！

記者：徐影龍

SanDisk呢部MP3機名為MP3COMPANION，擺到明為旗下嘅USB手指護航，最大特色係類似CREATIVE嘅MuVo咁，採用記憶體分離式設計，對應同廠新出全球最細嘅CruzerMicro記憶手指，可隨時抽離直插電腦抄歌，又或抄寫其他電腦檔案都得，相當之方便兼實用。MP3COMPANION本身賣相已頗為吸引，雖然暫時未知係咪採用全金屬外殼，不過渾圓外形加全銀色機身，的確幾討好，更有趣嘅係，當MP3機播緊歌時，USB手指上嘅燈更會恍如電源掣咁發出淡淡藍光，拎出街肯定潮爆全場！
CruzerMicro記憶手指最高容量達到512MB，不過同MP3一樣，發售日及價錢都未定。

■MP3COMPANION對應同廠嘅CruzerMicro記憶手指。
價錢及發售日未定

■分體式設計非SanDisk首創，不過更為青出於藍。

鈦金屬USB手指
除咗全球最細直插式USB手指外，SanDisk重推出一款以鈦金屬做外殼嘅USB手指，名為CruzerTITANUIM，靚得嚟亦夠晒硬淨。可能你會覺得使唔使用鈦金屬咁誇呀？其實喺商業用途的確有其價值，如大機構嘅超高級行政人員，好多公司機密文件要儲存，又或美術人員做完幾百MB圖像，一個唔該跌爛或壓爛咗，真係喊都無謂。
CruzerTITANUIM同樣最高容量達到512MB，接駁介面為USB2.0，抄入大量資料都唔怕等餐懵喇！

■USB插頭隨時都可縮番入CruzerTITANUIM裏面。