阿祖安奴喺上個禮拜日美洲盃決賽助巴西起死回生，成各大報章體育版頭條新聞人物；事隔啱啱一個禮拜，佢一歸隊就幫國際米蘭響友賽作客對保頓射入奠勝，佢咁博，無非想話畀人知佢唔使點操一樣咁弗，好似用行動向同佢爭位嘅隊友講：「唔使旨意！」
「阿祖」響秘魯期間，經常話知道隊波變動大，擔心來季正選難保，果然前日佢連呢場同保頓拍跳嘅比賽都唔放過表現自己，下半場落場二十分鐘唔夠就接應列高巴交波左腳射入。教練文仙尼睇見麾下猛將有料到，肯定飲得杯落，之但係因為受傷冇落場嘅韋利、馬田斯就肯定有得震、冇得瞓。
提起保頓，領隊艾拿迪斯話佢哋呢場波連坐後備席嘅球員都未湊夠數，所以會繼續物色人腳；不過提到約基，佢就堅持要收轉會費就免問。免費又想執好嘢，有冇咁筍先？
正當亞洲盃進入白熱化階段之際，中超聯部份球隊亦開始四出友賽，保持狀態；但暫時排中超聯第二嘅上海申花，到日本踢熱身賽，竟然慘輸日職業聯賽排第十嘅大分三神一比六，當地球迷俾呢支中國聯賽榜首球隊實力嚇親。我求大俠翻查，申花雖然冇外援助陣，但輸波認真羞家！
女網球手戴雲寶自從做咗人老婆之後，近一年不時暗示有意提早掛拍；但言猶在耳，呢位美國球手近期嘅狀態就勇不可當，加埋噚日打敗法網賽冠軍美絲姬娜贏咗聖地牙哥網賽，就已經連贏三項冠軍。戴雲寶突然咁厲害，唔知係冇咗心理壓力打嚟更放或想喺退休前留下美好回憶呢！
今夏喺美國搞嘅「世界冠軍球會爭霸戰」，參賽嘅全部係大名鼎鼎嘅球隊，不過最受歡迎嘅竟然係蘇超聯球隊些路迪，佢哋重已經接到邀請明年再到美國，戲金更超過一百萬鎊（約一千四百五十萬港元）！些路迪咁受歡迎，係因為佢哋球員好盡力，搞到啲中立球迷都投向佢哋懷抱。
前日阿積士對阿仙奴，兩隊嘅龍門表現勇猛外，A高爾又施展佢擅救空門嘅絕技，上、下半場各救一次空門，係場波冇波入嘅關鍵人物。印象中呢個後衞救空門當食生菜，一季梗有幾球，冇番咁上下反應同位置感都唔掂。假如隊隊波都有啲咁嘅球員，球賽入球率想唔拉低都難。