自由黨三大巨頭瞓身直選，主席田北俊喺新界東形勢大好，據聞最新民望數字反彈，上星期做嘅民調結果顯示支持度達二成半，可惜田少單人匹馬上陣，否則隨時有機會攞多一席。反而民主派支持度跌到得四成六，第三席危危乎，而民建聯劉江華同獨立議員黃宏發都好穩陣，新加入戰團嘅港進聯曹宏威博士殺傷力不大，佢想向中大人打主意睇嚟冇乜機會，黨內唔少人更擔心佢按金不保㖭。
選情形勢大好，但近日田少都唔係幾寬容，事關副主席周梁淑怡喺新界西遇上麻煩，因為「十點前特首」大班隨時殺入新界西，搞到周太近日行唔安坐唔樂，認真頭痕，有新界西地頭蟲分析，周太知名度高，如意算盤係吸納師奶票，以及不滿民主派又睇唔順眼民建聯嘅選民，若然人氣爆燈，話自己專門焚化垃圾嘅大班喺新界西參選，唔單止打亂自由黨如意算盤，連民主派都陣腳大亂。
選情日日新鮮，自由黨宣傳攻勢更加唔敢停，據了解八月中富貴黨會喺巴士上播廣告，呢個競選廣告雖然只長約一分鐘，但自由黨唔係求求其其就算，搵咗千萬大導演陳嘉上操刀，該黨高層唔肯透露搵陳嘉上拍片要幾多錢，八方聽聞預算達六位數字，富貴黨都算大手筆，除咗拍廣告片，自由黨月底亦會喺火車及鐵路沿線推出新一輪燈箱廣告。
田少拉票日日晨操晚練，雖則佢可以揸架「波子」跑車朝朝飛車入沙田大埔及北區，但佢家住山頂白加道，去新界東始終唔係幾方便，有沙田街坊報料，話見到田少頻頻喺早前餐廳被封嘅麗豪酒店出入，八方打聽之後知道田少原來喺麗豪租咗間房做「行宮」，方便休息亦可以同助選團密斟，不過佢就好錫身，無幫襯酒店餐廳，反而出街食雲吞麵，既可拉近同選民距離，又可一嘗沙田美食，真過癮。
傳真︰2623-9278
電郵︰