恒指跌36點，收市後滙控（005）同恒生（011）盤數出嚟，即月期指跌幅收窄。滙控半年多賺55%，恒生多賺24%，將對大市有利好作用。
滙控C輪9976：滙控盤數靚，股價會帶動滙控C輪。C輪超過70隻，揀到你頭暈，大多數溢價都好合理甚至好低，溢價低係因為滙控通常都好牛皮，股價變動三兩蚊個市就嘩嘩聲。可向買賣易、溢價低嘅C輪埋手。
有較大承擔風險能力，想搏殺，揀9976，11月初夠鐘，輪價27仙，溢價5%，槓桿率42.6倍（有效槓桿率15.5倍），引伸波幅好低，只有19.1%。呢隻爆炸力好強，可以飛沙走石，用嚟短炒比較啱。唔想波幅太大，穩陣少少，揀9783，9月尾到期，輪價53仙，溢價0.3%，槓桿率21.7倍（實際槓桿率15.8倍），引伸波幅更低，只有15.7%，因為年期短啲。
長實C輪9227：滙控好，領導股如長實（001）亦會唔錯。買啲長實C輪9227，昨收30仙，跌8%。隻輪11月初夠鐘，溢價6.1%，槓桿率19.2倍（實際槓桿率9.5倍），引伸波幅28%。另1隻可以諗吓嘅係9389，收39仙，散12%。隻輪11月到期，溢價4%，槓桿率14.7倍（實際槓桿率8.8倍），引伸波幅26%。
和黃C輪9390：長實好，和黃（013）亦好。諗些少9390，11月尾到期，溢價2.3%，槓桿率10.3倍（實際槓桿率7.3倍），引伸波幅26%。呢件莊家幾勤力，買賣價跟貼。
章盛