民主派香港島雙團隊噚日誓師兼報名，佢哋嘅競選口號叫做1+1=4，連負責睇數嘅湯家驊都話唔明解。余小姐就話好簡單，總之就係一個人投余若薇同何秀蘭嗰隊，就搵多個人投楊森馬丁個隊。
余小姐嘅必殺技係永遠笑笑口，佢老公胡醫生雖然烈日當空，仍然穿住套老西嚟支持老婆大人，而貪靚嘅Audrey就幾大都揸番啲潤膚霜，唔好晒襯。
馬丁太太噚日冇出現，但係個仔Joey就好支持，特別請半日假嚟打氣，馬丁梗係開心晒，楊森就話太太帶咗個小朋友去加拿大入營，要八月底先返港。
大狀黨真係好齊心，湯家驊、梁家傑同吳靄儀都有現身，以示團結。
梁家傑話自從宣布參選，已經瘦咗兩磅幾，噚朝一早又喺金鐘站向由九東過海返工嘅市民派傳單，佢認有時都分唔開邊個打邊個，反正張傳單四個候選人都推銷，算全港性，冇乜所謂啦。
傳真︰2623-9278
電郵︰