七月二十七日本欄寫《反對遺產稅》，讀者C太來電郵話：「丈夫是退休商人，辛苦耕耘數十載，省吃儉用，累積分毫，身家未能如富豪般可以成立基金，造福下代，但數目已超越政府限制個人遺產稅可擁有之限額……恐怕身後被政府抽去15%，而被迫將餘款分散於海外……」
C太問左丁山有何良策？考起。左丁山只係報道，本身唔係EstatePlanning專家，邊度敢教人如何保護遺產。政府嘅諮詢文件，可以在網上下載，唔使特別去政府機關攞，睇完就立即去信表示支持撤銷遺產稅可也。
根據諮詢文件附件一，香港只徵收境內資產嘅遺產稅，外地資產不須繳交遺產稅。故此如果財產唔算多（譬如一千五百萬元，稅率十五巴仙），不如就放晒喺離岸美元存款，因港紙與美元掛鈎，離岸美元存款（如存放於外資大銀行嘅新加坡分行，即係ACU亞洲貨幣單位）應該冇乜風險。可惜美元存款低，買美元債券有利息風險（美元已進入加息周期，利率升，債券價就會跌，如買美元債券，以短期為宜）。如果買外幣債券、外國股票，價格可升可跌，老人家唔想冒帳面損失風險嘅話，不如不買。
中產階級避遺產稅，確實冇乜好橋，左又驚時右又怕，只得任由政府宰割，故此左丁山認為所有中產人士都應該就諮詢文件表達意見，反對遺產稅，要求撤銷。假如某人有一層叫做豪宅，時值千二萬元（好耐以前二百萬元買番嚟，已供甩），一旦逝世，稅務局就會向繼承人收稅一百八十萬元。繼承人冇錢畀呀？麻煩咯，要搵專家度橋至掂，或者要向其他親友撲水交稅。到攞番層樓，沽售時，樓價跌到八百萬嘅話，可以喊多一次。