噚日駐港解放軍破天荒喺香港特區舉行八一閱兵典禮，以示陣容，當然呢隊兵同八九年六四嗰一夜嘅唔同，真係一支所謂嘅「威武之師、文明之師」。
駐港解放軍喺過去七年，表現其實真係值得一讚。中央既不用港人負擔一毛錢軍費，駐軍亦從不過問香港內政，佢哋真係貫徹落實「一國兩制」，軍紀之嚴，值得全國各省各市以及各單位學習。八方噚日喺電視睇見啲人民子弟兵喺烈日下列隊整齊地操過，都覺得有少少唔人道。
雖然民建聯班人好小器咁話，今次閱兵請埋民主派議員唔可以誇大話拉近咗中央同民主派嘅距離，但係人哋解放軍話晒都係第一個中央部門向民主派伸出善意之手，就算想嚇吓班民主派唔好亂嚟，都係明刀明槍，絕不含糊。
另外，駐港部隊嘅公關工作亦都一流，完全冇大細超，間間報館都一樣招呼周到，老董同班土共好心學吓啦。八方噚日喺沙田馬會撞到煲呔一家大細飲下午茶，多口問佢閱兵好唔好睇，佢話「梗係好！」
傳真︰2623-9278
電郵︰