正與富商李兆基兒子李家誠熱戀的徐子淇，前晚出席模特兒大賽招募活動，她表示知道有不少模特兒到場，本準備穿上四吋高跟鞋「增高」，但因忙於拍劇而趕不及換鞋，胖了不少的她更露出腰間的豬腩肉。
身為Elite旗下模特兒的徐子淇、「啤妹」Mandy及王秀琳等，前晚往尖沙嘴出席「2004精英模特兒大賽」招募活動。
徐子淇遲了一個多小時才到場，她表示剛拍完劇集《赤沙印記@四葉草.2》，她說：「連衫都趕唔切換，要着住戲服嚟，我知道今晚好多模特兒，個個都咁高，我本來準備咗對四吋高跟鞋，但係都冇時間換。」
前晚徐子淇露出腰間贅肉，坦言胖了不少的她說：「以前重肥啦，不過經理人公司都冇畀壓力要我減肥。」問她入行六年，認識男友李家誠算不算是最大的收穫？她說：「唔關事嘅，呢啲係緣份，唔係乜嘢收穫。」有記者大讚李家誠高大英俊，如果徐子淇與他合拍婚紗廣告，效果會很理想，子淇對此說：「我唔會批評佢，拍廣告梗係搵番模特兒㗎啦！」
另外，「啤妹」Mandy前晚穿上tubedress赴會，她透露已四個月沒有返老家馬來西亞，她說：「我成日飛去內地同韓國，拍咗好多廣告，好似有一個韓國手機廣告同埋洗頭水廣告，個洗頭水廣告要我不停咁跳，都幾辛苦。」Mandy又指因忙於工作，所以沒有時間拍拖。
採訪、攝影：JessicaNgan
