早排社會各界為咗七‧一遊行人數拗到火紅火綠，究竟幾十萬人流嘅場面可以係點？不如用個商業化嘅方法去推敲一吓吧。話說禮拜六宜家傢俬九龍灣德福廣場新店開張，地鐵噚日出咗份新聞稿，話當日吸引咗二十七萬人流到場，比起平均每日二十萬人次，激增三十五個巴仙，數字係根據商場主要出入口人流記錄器錄得，再加埋商場走廊人頭湧湧照片為證，睇怕都唔會有咩人去質疑啦。據蘭西當日有去趁熱鬧嘅親戚話，現場真係好多人。證明人都係貪新鮮。
地鐵總商場市務經理陳嘉明話，近年為開拓本地客源同吸引內地消費者，德福廣場引入咗好多受歡迎嘅商戶，的確可以刺激商場人流以及消費意欲，今後佢哋仍會沿用此策。
中環廖創興銀行大廈重建，蘭西之前提過，地盤嘅告示牌，唔清唔楚，連銀行名都冇，最近，銀行方面做番啲工夫，早排蘭西路過中環，順便望吓個告示牌，發現已經加番啲必須資料上個地圖度，好似喺銀行舊址同埋新世界大廈新址嘅位置上，加咗廖創興銀行嘅標誌，重有銀行個大名，咁咪清楚晒囉。
西灣河嘉亨灣開放示範單位以嚟，都請咗唔少型男美女，充當模特兒介紹新盤，扮演模擬住客。噚日喺樓盤嘅售樓處，又有靚人出現，名模Rosemary都去參觀示範單位，重好細心研究啲間隔用料。
睇完示範單位後，又好認真咁同發展商傾咗一陣。聽Rosemary嘅媽咪Julie講，之前幫女兒投資擎天半島有小小斬獲，如果要再買樓，都會揀啲優質樓盤咁話。
銀行搶樓按客愈嚟愈激烈，呢排焦點梗係九成半按揭計劃啦，息率再向下調之餘，重有現金回贈，優惠重唔係局限一手樓，二手都有㖭，買家真係愈遲入市愈着數。
蘭西聽坊間講，樓價百零萬嘅細價樓，銀行都唔放過，可以畀到全期優惠利率減兩厘七五，假如買家喺三年內賣樓，重唔使罰息㖭。
每逢長實有新盤開售，集團執行董事趙國雄都會粉墨登場，配合樓盤主題以不同形象示人，初時都令人有驚喜，不過耐咗就有啲膩，而且唔係次次都咁成功。好似噚日喺九龍塘畢架山一號，老趙一身古裝扮相，就驚嚇多過驚喜。唔講真係聯想唔到，原來佢係扮大俠楚留香，之不過近年身形暴脹嘅老趙，同楚香帥瀟灑嘅形象唔多夾，加上過濃嘅化妝喺烈日下暴曬，搞到油光滿面，全無大俠形象可言。
蘭西
電郵地址：
