自從三色台女主播珠珠人氣急升，早排重被雜誌狗仔隊偷拍行蹤，一眾主播嘅一舉一動份外引人注目。
八方老友前日去九龍塘又一城shopping，喺間名牌服裝店度撞到三色台一位男主播正同店員唔知拗緊啲乜，冇幾耐重call埋警察嚟，原來話懷疑男主播「撻衫」喎！不過最後雙方都解決咗，警方亦當一場誤會。
三色台新聞部高層向男主播了解後同八方講，話男主播聲稱當時試咗幾件衫後準備買其中兩件，但店員話唔見咗一件，雙方拗起上嚟重報埋警，點知男主播話後來先發現唔見咗嗰件衫，可能喺試衫時跌咗落去佢其中一個購物袋度，總之間名店決定唔追究，差人亦收隊走人。三色台高層語重心長咁話，平時已成日提點啲主播作為公眾人物，要小心自己嘅言行，點知又差啲搞出個大頭佛嚟喇！
傳真︰2623-9278
電郵︰