趙薇日前涉嫌指使他人毆打孕婦鄒雪，由於連日嚟鄒雪不停向趙薇發炮，趙薇胞兄趙健終於忍無可忍，企出嚟為個妹講說話。
曾經喺《時裝》雜誌做過嘅鄒雪，話趙薇着日本軍旗服影相呢單嘢唔關佢事，但趙健前日向新浪網發表嘅聲明中踢爆，○○年五月，鄒雪搵趙薇影《時裝》雜誌封面，由揀衫到擔任繙譯都係鄒雪一手包辦，影相當日對方全日都喺現場，雖然趙薇一身蟻都係多得鄒雪帶挈，但趙薇唔止冇責怪鄒雪，重同對方夾份開酒吧。
趙健話酒吧後來資金不足，都係佢額外攞錢出嚟幫補，絕對唔係鄒雪所講話趙薇欠佢哋錢，後來大家經營上意見分歧，佢哋想同鄒雪拆夥，但聯絡對方多次都冇回覆不特止，鄒雪重唔聲唔聲攞走晒酒吧啲文件同搬走所有物品。趙健又話：「我決不容忍別人任意欺侮我妹妹！」對於鄒雪惡意中傷同誹謗，趙健話無論如何都會追究到底。
E-kids之前走咗個成員，搞到成隊人都好耐冇出席公開活動，噚日E-Kids舉行「Chapter2新成員發佈會」，介紹阿Nick加入，台下歌迷又送香檳又尖叫，阿Nick重第一次出場就有擁躉獻花，E-Kids嘅成員都話好懷念有歌迷歡呼嘅情景，而Chapter2係譚詠麟改嘅，寓意佢哋進入第二個階段。
劉雅麗會喺今個月舉行演唱會，噚日佢同埋媽咪喺觀塘綵排，劉雅麗重會喺演唱會上懷念已故六位巨星，包括鄧麗君、黃家駒、陳百強、張國榮、梅艷芳同羅文，到時會喺現場出字幕，等觀眾都可以一同唱出佢哋嘅歌曲，有啲環節重會同媽咪合唱，𠵱家劉雅麗已經積極養聲同練氣迎接演唱會。
2R兩姊妹噚日去咗銅鑼灣，出席由佢哋代言嘅MP3發布會，2R話好想公司可以送佢哋一人一部MP3機。問到Rosanne會唔會送一部畀佢緋聞男友陳冠希？點知喺Rosanne猶豫點答之際，阿妹Race已經搶住嚟回應話：「佢（陳冠希）都唔係我哋公司嘅！」
