商業電台揸弗人好少在電視亮相，為了與鄭大班解約，上節目誇誇其談，一個人可以獨白起碼二十分鐘（冇準確時間，大編輯聽咗，估俞琤講咗咁耐而已），而且有好多四字句如「胸懷社會、無畏無懼、不亢不卑……」以一個十六歲中學畢業就投身社會嘅人嚟講，確實係有天才嘅，而且自修讀書唔少。你試吓叫一個今個星期放榜嘅中學生（十A尖子又點話）講三、五分鐘，睇吓佢哋會講成點。
講得好唔等於有道理，從李鵬飛嘅反應就可知一二。俞琤講：「接二連三，棄兵曳甲」，黃毓民係「擅離職守，離台出走。」夠晒巴辣，一棍掃晒，要黃毓民現身，先至有料反駁，我哋啲笨蛋，學都學唔切，點識講。
小秘書姬莉絲睇電視，見到俞琤黑衫黑褲男仔髮型，好天真咁問：「俞琤好型喎，好睇過梁文道？」笑到佢家姐肚痛。有線播番一張舊照，姬莉絲驚呼：「呀，欣宜效應呀，俞琤原來舊時似半個肥肥，𠵱家好似重瘦過欣宜，佢去邊度纖體啦吓？」呢個真係一個好問題，以俞琤嘅知名度，啲纖體公司唔一早搵佢做代言人，實在係走寶。不過𠵱家都未遲，如果纖體公司有辦法，搵到俞小姐賣廣告，一定會好收得。娛樂名人版記者其實都應該追訪俞琤，寫佢嘅減肥過程，一定有好多小姐師奶睇。
姬莉絲睇完俞琤、鄭大班嘅「有線電視」出鏡新聞，唔明白佢哋講乜，請左丁山解畫，其實冇乜好講，一字記之曰「利」，以往鄭大班與商台互惠互利，非常happy，現在大概有人以為大班嘅廣告生產價值下降，就不如斬纜咯。呢啲商業行為，無可厚非，喺中環日日都有發生。不過斬纜就斬纜啦，咁多嘢講，於己無益，於人有損，一字記之曰「戒」。