今年漫畫節吸引不少年輕人到場參觀，莫文蔚與胞兄以及薛凱琪等，昨日便在灣仔會展舉行簽名會，長有一張娃娃臉的薛凱琪更憑美少女形象，成功吸引半百少男搶購其寫真集及隨寫真附送的布公仔。
薛凱琪昨日在漫畫節會場舉行寫真集簽名會，購買其FTrip寫真集的歌迷可獲贈布公仔，限量三百個，該趣致布公仔還附出世紙，與捧着它的薛凱琪同樣可愛。
昨日圍觀及排隊索簽名的大部份都是男孩子，他們抱着薛凱琪的布公仔，顯得十分陶醉，對此薛凱琪說：「個公仔我第一次拍唱片封面同拍MV都有帶喺身，我呢個係第一個製造，陪我好耐，因為白色，所以好似幾污糟，我都想洗，不過洗衣舖話如果洗怕會爛，咁冇辦法啦，我都唔會丟，我覺得呢個公仔帶畀我好運，係我嘅幸運公仔。」
莫文蔚昨日亦有出席漫畫節，支持胞兄設計出品的動畫公仔寶貝寶，莫文蔚說：「我由細到大都冇畫畫天份，我哥哥就好勁，細個佢會畫公仔𠱁我開心，我希望呢個有教育意義嘅公仔可以衝出亞洲去到全世界，之前哥哥將啲公仔畀法國細路仔睇，佢哋都好鍾意。」
此外，麥浚龍（Juno）及吳日言在漫畫節擔任年輕人音樂祭2004表演嘉賓，去年是漫畫節大使的Juno說：「今年冇時間做，但係我都做音樂會表演嘉賓，本身好鍾意睇漫畫，重有好多珍藏㖭！」
採訪、攝影：楊潔雯
