身為NorahJones師妹嘅實力唱作新人KeriNoble，日前同音樂監製男友JeffArundel一齊嚟香港宣傳佢隻處女大碟《Fearless》。佢喺中環KeeClub表演嗰陣，以性感裝束上陣，謀殺在場記者不少菲林。
聲稱受到著名女歌手JoniMitchell影響而做創作女歌手嘅Keri，佢喺處女大碟入面嘅形象密密實實，點知佢第一次嚟香港宣傳，即以性感打扮出席表演活動，令全場記者嘩然。Keri更喺音樂監製男友彈木結他伴奏下，一邊彈鋼琴，一邊大展歌喉，贏得全場人士嘅掌聲。
Keri新碟好評如潮，雖然佢啱啱正式入行，但原來佢五年前已自資出過一張CD，𠵱家已經絕晒版，網上重炒到成千蚊港紙一隻，但係Keri就話：「嗰陣自己仍未掌握好寫歌竅門，但四年前遇到Jeff後，佢就教識我好多嘢！」
Keri接受訪問時又被記者取笑，一時話佢似《X檔案》嘅姬莉安德遜（GillianAnderson），一時又話佢似《色慾都市》嘅莎拉謝茜嘉柏加（SarahJessicaParker）。Keri就笑笑口咁話：「我冇聽人咁講過，但有台灣記者話我似奧瑪花曼（UmaThurman），不過，我都好鍾意睇《色慾都市》。」