港股冇乜方向，上周五美股微升，指導作用唔大。恒指上周收12238，短期上升與下跌空間估計都係百幾點。
今日收市後，滙控（005）與恒生（011）派半年成績表，相信對大市左右亦唔大。滙控每變動1元，影響恒指36點；恒生每升跌1元，只係拉高扯低恒指6點。
中石油C輪9839：上周五紐約期油收43.80美元，又升1.05美元。油價升，對油股有利。美國油股同本港掛牌嘅油股，近排升勢未與油價升勢相稱，與油價未來升勢未必能夠持續嘅預期心理有關。不過亦因為油股近排唔係升得急，日後油價若然回落，油股未必會跟埋回落。
中海油（883）升幅大過中石油（857），博中石油追番上去，買中石油C輪（即Call輪）。搏殺短炒揀9839，10月初到期，輪價23仙，溢價4%，槓桿率16.8倍（有效槓桿率8.8倍，即短期內輪價變化幅度係正股波幅8.8倍左右），引伸波幅37%。
想穩陣啲，則揀9343，12月初夠鐘，輪價71仙，溢價0.3%，槓桿率5.5倍（有效槓桿率4.5倍），引伸波幅亦係37%。
九倉C輪9086：九倉（004）近排勢靚，不過勢靚都唔易直線上去，吼住有回吐之時，低位收集C輪。可供選擇嘅標準輪好少，9086可以留意吓。
9086喺11月尾夠鐘，輪價62仙，負溢價0.5%，槓桿率3.9倍（有效槓桿率3.7倍），引伸波幅33%。
章盛