今屆歐國盃後，葡國戰將普遍身價高漲，「黃金一代」三元老雷哥斯達、費高同埋古圖就除外。冇隨AC米蘭大軍赴美嘅雷哥斯達，一歸隊就積極操練，志在爭位，但睇形勢佢今季上陣機會更少；至於早兩日有報道話費高受皇馬冷落，會方話同佢傾續約唔係唔得，但要出年三月至有得傾喎。
話說「達哥」係AC唯一有份踢歐國盃決賽嘅球員，所以係最遲歸隊嘅一位，而據報佢一歸隊就勤操，又主動搵AC實驗室幫手操弗自己，態度甚至比同樣留響意大利嘅史譚、湯馬臣更積極。可惜佢年事漸高、基斯普加盟亦令球隊唔會再踢單箭頭，中場少個位，「達哥」落場機會更微；佢死練爛練態度固然好，至怕得個桔。費高情況唔好得幾多，皇馬唔肯即刻同佢傾續約，反映失勢。至於古圖恢復自由身後，重未聽聞佢搵到新落腳地，都係失意人。
英超雙雄阿仙奴同曼聯，唔單止係球場內鬥到難分難解，亦球場外亦鬥得精采。自從「紅魔鬼」推出咗曼聯電視（MUTV）後，「兵工廠」亦將推出阿仙奴電視（ArsenalTV），並且已同十五個亞洲及中東國家簽咗約，每星期會有三小時有關「兵工廠」消息嘅節目播出㖭！
前英格蘭國腳中場加斯居尼，幾經辛苦先喺英非聯賽球隊波士頓聯做副領隊兼球員之後，都不知幾認真，由「肥仔嘜」變「鋼條」。佢本來喺上周六紐卡素對格拉斯哥流浪嘅友賽之前做特別嘉賓，點知懷疑食物中毒要入院，球迷想睇佢嘅風采，就要等到周一波士頓聯嘅友賽喇！
曼聯喺季前熱身賽嘅世界冠軍球會爭霸戰之中，喺上周六互射十二碼輸埋畀AC米蘭後，三戰皆北，咪話唔樣衰，佢嘅美國龍門侯活喺自己地頭燒鬚，亦好冇癮。因為對AC場波時，侯活九球十二碼都撲唔到之餘，自己主射嗰球更加中柱唔入，令到對手AC米蘭勝出。
南韓輸畀伊朗八強止步，再同亞洲盃冠軍無緣。賽後南韓班球員話𠵱家輸畀伊朗，好過輸畀東道主中國，話晒一直喺國際賽尅住中國，到時輸畀對手會好冇面。我求大俠覺得，南韓輸波都冇話唔抵，因為伊朗實在打得太好，賽後咁講，反而會俾人覺得係唔肯認輸，冇亞洲強國風度喎！